Am leɛwayed-is, di yal ddurt taneggarut n waggur n ɣuct di 25 alamma d 27 , taseqqamut n taddart n lemsella akked d tidukla tadelsant Tiɣilt n taddart n Lemsella deg tama n Iloula Oumalou s lemɛawna useqqamu aɣerfan n lwilaya n Tizi Uzzu , ttheggin-d tameɣra n tbexsisin. Ahil n useggas-agi d amerkanti: timsikniyin, isaragen, uraren n yigerdan , amezgun , timsizwert n ccna…atg. Ass-nni n lexmis yella-d beddu n tmeɣra s wurar n tarbaɛet n yitran n Mulud At Mɛemmer d ucewwiq n lxallat I d-yezzin i yizenqan n taddart. Syin, yella-d usenɛet n leṣnaf n tbexsisin yemxalafen ideg ara ad naf: taɣliḍt, taɛemrawit, azanjar, abuqbus, taberkant, tisgemt, tifendaruct, amuḥli, abaran, debza, aqurci acebḥan, taɣanimt…at. Tameddit n was, ikemmel wahil s yiwet n temlilit iwumi semman “ inzan n lexrif”; deg-s mlalen-d yifellaḥen n taddart d kra n yijenyuren n tfellaḥt, yezzi wawal ɣef tneqlet d wamek ilaq ad yili usefrek d useḥbiber ɣef lxella-s di temnaḍin n yidurar n leqbayel. “iswi-nneɣ d asnerni n wuẓẓu n tneqlin d ufras n wayen yellan yakan , imi ass-a tazart tewwi-d azal-is di leswaq igraɣlalen , tesɛa amkan-is deg usnerni n tdamsa n tmurt, “ I d-yenna Mass Abdelakader Bouacherine, d imdebbar n taddart ”. Ilaq ad d-tili lxedma tdum ma nebɣa lɣella am akken qqaren lejdud :’’ur d-ɣelli tbexsist s imi ma yella bab-is yeqqim d iɣimi’’ I d-yenna Dda Mhand d afellaḥ n taddart. ɣer yiḍ ahil yekfa s umezgun d usbuɣer n lxalat. Ass n wis sin n tmeɣra, (26 di ɣuct 2016), ɣef lewhi n 10h, tennerna ccbaḥa n tmeɣra n tbexsisin di Lemsella s usenɛet n tqendurt taqbaylit I d-lsant tullas n taddart, zzint-d I yizenqan n taddart s wurar d ccnawi. Rran-tt wid I d–iheggan tameɣra ad tili d-tajmilt I tcennayet n teqbaylit Malika doumrane . Tameddit n wass ,tella-d temsizwart n ccna atrar gar yilmeẓyen’’Rock’’, d tajmilt i tarbaɛet ‘’Les Abranis” , iwumi tuɣal tejmilt ɣer yiḍ seld imi kfan ahil n wass wiss sin s ccnawi-nsen yettaken abeḥri turet. Ass-nni n sebt, 27 di ɣuct yekfa wahil n tmeɣra n s ufraq n warrazen i warrac n taddart i d-yufraren deg leqraya deg yiswiren yemxalafen, medlent tewwura n tmeɣra n ccna aqbur d ucewwiq ccdaḥ.
Brahim Benhamouche