Taddart n Igounane Ameur, d yiwet seg 23 n tuddar n tɣiwant n Ait Aissa Mimoun, i d-yezgan deg ugafa n tɣiwant-agi u deg ugafa n lwilaya n Tizi Uzzu, tebԑed ɣef temdint-a azal n 10 km. Taddart-agi, mazal ar ass-a n wussan tettidir lexsas d ameqqran deg yiḥricen d yisenfaren yemgarden n tudert tartar, gar-asen: ttawil n Internet, lgaz n temdint, yir liḥala n yiberdan, asezdeg n twennaḍt, imḍiqen i yilmeẓyen d uɣbel n waman n tissit…Ssuturen imezdaɣ n taddart-agi n Igounane Ameur deg yimḍebbren teεna temsalt, ama d wid n usqamu aɣerfan (APC) n Ait Aissa Mimoun ama d wid n lwilaya n Tizi Uzzu, i wakken ad d-rren lwelha-nsen ɣer taddart-agi yenḥafen aṭas si yal tama. Menbeεd mi ttidiren akka tura deg tegnatin qessihen. Ma d iɣeblan i d-ttmagaren yal ass, ad naf deg tazwara aɣbel n waman n tissit, imi ufan-d iman-nsen ttnadin ɣef tiqit n waman anida ara tt-id-awin. Acku ttɣaman laqdɣa deg unebdu azal n 7 ar 10 n wussan i wakken ad d-uɣalen waman yiwen ubrid. Cetkayen daɣen, ɣef uεeṭṭel n uṣiweḍ n lgaz n temdint s ixxamen-nsen imi ṛwan lḥif ladɣa deg tesmehuyt n tegrest, neɣ deg ussan n ccetwa, imi acḥal n tikkal i leḥḥun d likumiṭer i wakken ad d-awin taqqerԑat n lgaz, uɣur ara sewwen neɣ uɣur ara seḥmun. D ayen i ten-yeğğan ad d-gren tiɣri yerna ad ssutren deg wid teԑna temsalt, gar-asen: imeḍbbren n tɣiwant Ait Aissa Mimoun, d Tanmehla n Imuhal Izuyaz, i wakken ad yefru wugura-a deg wussan i d-iteddun. Aɣbel wis ukuẓ, d win n yiberdan imi aṭas n yiberdan yellan deg taddart-agi, ha-ten-in deg yir liḥala, yecban abrid ameqqran yeqqnen gar-as d Ighil Bouchene rnu ɣer-s abrid yellan daxel n taddart. Aḥric n tedwest d ṣṣeḥa, yenxas ugar n yiḥricen-nniḍen, imi zik yella yiwen n uxxam n tujjya d amecṭuḥ acu kan yeɣleq achal-agi, ssebba imi ur yesԑi ara aṭas n ttawilat n udawi. Mebla ma nettu ugur n Internet, i mazal ur yefri ara. Ma yebɣa yiwen ad yazen neɣ ad d-yawi kra seg Internet, ilaq fell-as ad yerzu alamma d tamdint n Tizi Uzzu. D annect-agi akk n yiɣeblan I yerran tudert n twaculin n taddart n Igounane Ameur, ttidirent deg lḥif d lmeḥna, ɣef waya ssuturent deg yimḍebbren ad d-lhin deg wuguren iceɣben allaɣ-nsen u ad d-afen tifrat i yiɣeblan s tazzla.
Adaoun Abdel Ghani