Azal n 8 691 006 n yinelmaden n tlata yiswiren n leqraya i yuɣalen iḍelli ɣer uɣerbaz deg tmurt n Lezzayer.
Gar-asen : 493 626 yinelmaden n useggas nuheggi, 4 209 022 yinelmaden n uɣerbaz amenzu, 2 727 160 yinelmaden n uɣerbaz alemmas akked 1 261 198 yinelmaden n tesnawit. Ad ten-slemden 459 100 yiselmaden, rnu ɣur-sen 28 075 yiselmaden imaynuten. Ma d iɣerabzen, ad naf : 191 126 yiɣerbazen imenza, 159 954 yiɣerbazen ilemmasen akked 108 954 n tesnawiyin. Ugar n 68 800 000 n yidlisen i d-yettuheggan i lmend n tuɣalin-a, gar yeqdimen akked yijdiden.
Ayen ara yilin d ajdid
80 % n yiḍrisen i yellan deg wahil n uselmed (Tasuta tis snat), ttwakksen-d seg yidlisen uran Yizzayriyen, mačči am wakken yella lḥal uqbel, anda qrib ulac maḍi imyura n tmurt. Ad ilin idlisen ijdiden i uḥric amezwaru n uɣerbaz amenzu (aseggas amezwaru d wis sin) akked useggas amezwaru n uɣerbaz alemmas. Deg uɣerbaz amezwaru, ad ilin kan sin yidlisen i useggas amezwaru d useggas wis sin anda ara mlilent tangayin : tangayin n tussna, weḥd-sent, tin n tsekla weḥd-sent. Ad tettuselmed tmaziɣt deg 34 n lwilayat mačči kan deg 22 n lwilaya n useggas iɛeddan, ciṭ ciṭ alamma tewweḍ ɣer 48 n lwilayat, ɣef wakken i d-nnan yimḍebbren n usegmi. Ad yili usileɣ n yiselmaden deg yal imuras, ɣef teɣzi n useggas. Ula d lweqt n uselmed ad yimɣur : seg 34 n smanat, ad yuɣal ɣer 36 n smanat. 34 n smanat i uselmed, snat n smanat i uktazal.
H.Moula