« Mačči d tikkelt neɣ snat I d-nettas nettaf-d timacinin ḥebsent. Imḍebbren ttawin-d win ara tent-iseggmen seg tmanaɣt, tikwal nettraǧu alamma qrib d tameddit iwakken ad ndawi, tikwal nettuɣal akken ɣer yixxamen-nneɣ. Taswiɛt qessiḥet fell-aɣ, mačči d ayen iwumi nezmer ad as-nesber. »
Taggara n yimalas yezrin, imuḍan n tgeẓẓal beggnen-d lɣiḍ-nsen sdat n liḥala i ttidiren yal ass s yiwen n yibeddi azal n tsaɛat deg sbiṭer Mohamed Boudiaf yellan di temdint n Tubiret. Imuḍan-a iɣef yettwaḥettem usizdeg n yidammen rfan seg waṭas n temsal yesseɛwaqen adawi-nsen, imi d wid ur nezmir ad idiren mebla ma ttɛeddin ɣer tmacinin n usizdeg yal tikkelt. Dɣa, d tamsalt-a n tmacinin i ten-yesserfan s waṭas, acku, ɣef leḥsab n yimeslayen-nsen d tid ur nteddu ara akken iwata. «Mačči d tikkelt neɣ snat I d-nettas nettaf-d timacinin ḥebsent. Imḍebbren ttawin-d win ara tent-iseggmen seg tmanaɣt, tikwal nettraǧu alamma qrib d tameddit iwakken ad ndawi, tikwal nettuɣal akken ɣer yixxamen-nneɣ. Taswiɛt qessiḥet fell-aɣ, mačči d ayen iwumi nezmer ad as-nesber.» I d-yenna uselway n tiddukla n yimuḍan-a, Rabah Izem. Mačči kan d yiwen n uɣbel I yerḥan imuḍan-a, maca ggtent tlufa, imi ula d amsejjay yettuxeṣṣen deg waṭan-a ur yettili ara. “Ad d-naweḍ, ad aɣ-ar zen ɣer tmacinin azal n kra n wakud, syin ad nuɣal, mebla ma yella akka kra n win ara inadin liḥala-nneɣ ma twenneɛ, neɣ ahat iwulem akka ad nexdem kra n rradyu neɣ ilaq –aɣ ddwa nniḍen.” I d-yenna yiwen seg yimuḍan iɣef i d-iban reffu. Taluft tis tlata d tin yerzan imḍebber n uḥric-a. Ɣef leḥsab n yimuḍan-a, win yellan deg umkan-a ur yesɛi ara kra n tirmit deg udawi neɣ n usewjed n ttawilat I wid yurez waṭṭan n tgeẓẓal. “limer d lebɣi, win ara yilin deg umḍiq-a ad yili meqqar yesɛa tikta ɣef wamek ara ibedd s amuḍin d wayen I as-ilaqen. Maca, nekni ur nufi win ara d-yezzin ɣur-neɣ tamuɣli, ahat ad yessixfef fell-aɣ taɛkemt.” Mass Izem, yenna-d dakken ddula ur tesxas ara di ttawilat I ḥwaǧen yimuḍan, maca deg unnar, nettwali ṭṭuqten wid yettɛewwiqen lecɣal. Imḍebber yellan yakan ɣef uqerru n tmehla n usejji yewɛed-aɣ ad d-yawi timacinin timaynutin, maca netta iruḥ, nekni neqqim nettgani. Ɣer melmi ara tifrir fell-aɣ tagut ?” I d-yekfa awal-is.
Smail. M