Seld aṭas n uraju d leɛtab, tazzla seg, ɣer teẓrigin ara as-yilin i lmendad n usuffeɣ n udlis-is. Ar taggara, yeẓra tafat wungal “Deɛwessu n Lqayed” n Ccix Lyazid. Ɣas akken aṭas i yuzzel fell-as, maca yuɣal yessuffeɣ-it-id ɣef ddemma-ines, acku ɛlaḥsab-is ur yufi ara tallelt i uraju deg teẓrigin uɣur yennum yessuffiɣ-d yakan ifarisen-is, neɣ ɣer teẓrigin s umata i d-yessuffuɣen idlisen n tmaziɣt. D ayen i yeǧǧan Ccix Lyazid ad yesḥisef ɣef waya. S wungal-agi “Deɛwessu n Lqayed”, yewwi-d umeskar ɣef tedyanin yeḍran deg tama anida yezdeɣ, deg taddart Iɣil Umsed (Icellaḍen) d tamiwin i as-d-yezzin am Uqbu d Ṣedduq.
Ccix Lyazid, yuɣal yis-neɣ ɣer tallit taqburt, ideg yedder Lqayed Ben Ɛli Crif deg temnaḍt-nsen, igmer-d tinagiyin ɣur yimɣaren d temɣarin i d-yecfan neɣ i asen-d-ḥkan ɣef talliyin-nni. Yefka azal n useggas di lweqt-is, gar unadi, agmar n yisallen d tnagiyin, akken ad yessiweḍ ad yekfu adlis-is deg tazwara n wayyur n yennayer yezrin, armi i d-yeffeɣ ass n, 24 deg furar 2020. Yemmeslay-d ɣef maḥyaf i iga Lqayed Ben Ɛli Crif deg yiseggasen n 1870, d wamek yemxalaf d Ccix Aḥeddad yesnekren tanekra n 1871, d Lmeqrani.
Tacḍadt n lḥif yesbur Lqayed-agi ɣef yimezdaɣ. D adlis daɣen swayes yerra tajmilt i kra n yimdanen, gar-asen, setti-s, jeddi-s, baba-s d yemma-s d kra n yimɣaren n taddart. Ccix Lyazid, s yisem-is aḥeqqani Ben Henou Lyazid, aṭas i yeqdec deg tddukkliwin tidelsanin. Yunag ɣer tmurt n Merruk i wazal n 5 iseggasen. Yessuffeɣ-d yakan, “Isefra n tefsut” deg 2012, “Rreḥba n tneqqisin” deg 2017, “Ajellad d umyaru” deg 2018. Ungal “Deɛwessu n Lqayed”, d tirmit-is tamezwarut deg tira n wungalen.
Nga yakan yid-s tadiwennit deg Uɣmis n Yimaziɣen deg waggur n Ɣuct 2019, yessegza-d leqdic-is d yiṣenfaren i t-yettrajun. Yenna-d ɣef uḥulfu-s, mi yewweḍ ɣer yiswi-s s tuffɣa n wungal yellan d targit, ɣas akken iɛetteb-it aṭas, maca yethenna wallaɣ-is, ikemmal yenna tamaziɣt teḥwaǧ tarwa-s, akken i teḥwaj at tdamsa i tallelt.
Kh. A.