Zik, llan tlata watmaten ttidiren dduklen am yiḍuden ufus. Tteddin wussan, ttemsukkasen-d, ttnaɣen armi kkren ɣer beṭṭu. Bḍan tanezduɣt rnan tiferkiwin. Teqqim-asen-d yiwet n tzemmurt, tuzga-d gar-asen. Yenna-as umeqqran, d nekk ara tt-yawin, d nekk i d ameqqran. Yenna ulemmas deg-sen, ala d nekk kan ara tt-yawin, ifurkawen-is mmalen-d ɣer wayla-w. Ma d amecṭuḥ isemmaḥ, yenna-asen nekk fkiɣ-awen-tt.
Ttnaɣen akken, yal wa yeqqar-as i wayeḍ d nekk ara tt-yawin. Armi ulac ṣwab, ṛuḥen ɣer umɣar azemni ad iḍebbar fell-asen.
Nnan-as akken twalaḍ igerrez ad nexdem. Yenna-asen, ishel ṛṛay-is, ṛuḥut mi awen-ssawleɣ, aset-d. Ikker umɣar-nni azemni issawel i yiwen isseɣlay isekla, yenna-as, seɣli tazemmurt lmuḍa leflani, gzem-itt d isɣaren tferqeḍ isɣaren-nni ɣef sin n yimura. Issawel-asen umɣar i sin watmaten-nni, yenna-asen ha-tt-n tazemmurt-nni, tuɣal d isɣaren, yal yiwen deg-wen ad yerfed amur-is. Ruḥen ddmen isɣaren-nni wwin-ten. Uɣalen s axxam feṛḥen. Yugra-wawal qqaṛen: D yir ṛṛay i yqellen tazemmurt. Nudeɣ ɣef yixef-is. Ufiɣ aẓar-is. Remdane Lasheb