Aṭas i yettazzalen tura akka d awal ɣef yimal n ubrid n Ɛecba deg Xerraṭa. Imdanen ttmesteqsayen ladɣa ɣef lweqt i mazal akken ad kfun lecɣal n ureqqeɛ d ussuseɛ n ubrid-a i yebdan deg 2013, akken ad tthennin, dayen, xersum ciṭṭuḥ kan, i lḥers i d-yettnulfayen yal ass deg ufalu (tunnel). Ula d lwali n Bgayet, mass Uld Saleḥ Zituni, yella yerza ɣer din ɣef demma, yebrir iɛeddan, ad yessefqed ɣef lxedma, ad yessuter, diɣ, kra n uɣsab deg yimḍebbren n usenfar. Tazwara, mi akken teṭṭef tkebbanit Haddad, lwaḥi d teṭurkit asenfar, yella-d umsifham ɣef 30 n wayyuren i keffu n lecɣal. Maca, taggara-a, iban-d am wakken tbeddel taluft. Aya, segmi ḥebsen yiqeddicen kra n lweqt akken, imi d-llan wuguren n lxedma d tedrimt, uɣalen kemmlen. Dɣa, yenna-d imir-nni yiwen seg yimḍebbren n termist dakken ssaramen ad asen-ternu lḥukuma i ssuma-nni tamezwarut swayes ṭṭfen lxedma. Ɣef leḥsab-nsen, ma yella qqimen akken atan nṭerren, ad xesren ɣer taggara. Seg waya, ussan-a kan, aṭas i d-sḥebsen deg yixeddamen d txeddamin mi walan ur asen-sran tura i waṭas n yifassen akken ad qedcen. Ur zmiren, daɣen, ad ten-ttxellisen deg waṭas deg-sen. Seg tama n Tsexriwt d Ayt Smaɛel, ma drus snat n teḥdayin i d-sṭaxxren seg lxedma, wiss ad uɣalent neɣ uhu. Imi, akken i aɣ-d-yewweḍ yisalli, yella win i d-sṭaxxren d asṭixxer, yella win i sersen ad yesgunfu war axelles di leɛḍil alama i d-teḥḍer tegnit ad yuɣal. Ad d-nesmekti kan, belli azgen seg lecɣal n ubrid-a, yemmug dayen, ur d-yeqqim ihi xilla. S teldayt n ubrid-a n Ɛecba qabel neɣ wabel, ad d-yawi ayendin d talwit d userreḥ i ubrid aɣelnaw wis 9, ladɣa, deg ufalu aqbur iwumi ssawalen yinehharen merra « Afalu n lmut ».
Mhenni Khalifi