Tafaska-agi deg tezrigt-is tis sat, tebda iḍelli 23 deg tuber 2016 deg uxxam n yidles Mulud At Mεemmer n Tizi Uzzu. Aṭas n yidisan i yettekkin deg usuddes n leqdic-agi ameqqran, gar-asen : Taneɣlaft n yidles, tanmehla n yidles n Tizi Uzzu d usqamu n tfaska tadelsant n uẓeṭṭa n At Hicem, s tallelt n tenmeḥla n tmerrit d tẓuri, tanmehla n uxxam n yidles Mulud At Mεemmer. Ad tili tfaska-a ɣef teɣzi n 5 wussan, imi tebda iḍelli n Letnayen 23 deg tuber 2016, ad tdum almi d ass n 27 deg waggur-agi ideg nella. Deg tezrigt-agi tis sebεa, ad ttekkint azal n 7 n lwilayat, ara d-yesneɛten axeddim-nsent, ad naf: Xencla, Ґerdaya, Tlemsan, Tamenraset, Tipaza, Um Lbawaqi d temdint n Tizi Uzzu i d-heggan leqdic-agi. Ma d ahil i yettwajerden i wanect-a, tella-d iḍelli u mazal ad ilint temsikniyin s usenzu n uẓeṭṭa n 7 lwilayat-agi i yettekkin deg tfaska. Iḍelli ssbeḥ i tebda s wudem unsib tezrigt-agi tis sebεa n uẓeṭṭa n At Hicem. Dɣa tella-d yiwent n terbaεt n uẓawan i d-iccnan kra n tezlatin, am wakken, daɣen, i d-yella usenεet n tceqquft n umezgun, d umeslay sɣur yimḍebbren d idisan i d-iheggan tazrigt-agi tis 7 n uẓeṭṭa. Ma deg ass uqbel aneggaru 26 deg tuber 2016, ad d-tili temsizzelt n uẓeṭṭa igerrzen. Azekka-in tameddit, ad medlent tewwura n tfaska-a s tukci n warrazen i tlata (3) n yiẓeḍwa i d-yufrar deg temsizzlt, am wakken daɣen ara d-tili tukci n yigerdasen n usebɣes i widak akk yettekkin deg tezrigt-agi tis sat. Imḍebren i d-iheggan leqdic-agi, bɣan ad ẓẓun imɣi n usefti d ulmad n yilmeẓyen i urmud-agi yesεan azal ameqqran, imi si tama ad ṭṭfen deg wansayen , tgemmi d irmad-nneɣ iqburen, si tama-nniḍen d axeddim adamsi (économique), i lmend n wayen i d-issekcam n udrim.
Adaoun Abdelghani