Thegga-d Tenmehla n yidles akked Uxxam n yidles Mulud Mɛemmri n Tizi Uzzu, yiwen wahil d anesbaɣur, ad yeddu ɣef teɣzi n ddurt. Imi yebda yakkan ass-nni n lexmis 30 deg unbir 2017, ad yessali ass n ssebt 07 deg duǧamber 2017. D ahil adelsan ara d-yilin deg Uxxam n yidles n Tizi Uzzu akked Uxxam n umezgun amniḍan n lwilaya.
Ahil n uxxam n yidles
Ahil yerzan Axxam n yidles Mulud Mɛemmri, yella-d akka: ass-nni n lexmis 30 deg waggur-nni n unbir yezrin, yemwatan akked usfugel wass n Lmulud. Dɣa deg tzeqqa n temsikniyin, llant-d kra n temsikniyin yerzan idlisen n ddin, arraten (manuscrits) n zzawiyat akked useddu n tineslemt n lwilaya n Tizi Uzzu. Yella-d daɣen ucɛal n tcemmuɛin akked tuqqna n lḥenni. Ma deg tzeqqa tameẓyant n umezgun, yella-d usarag ɣef wazal n Lmulud, sɣur unemhal amatu n uɣlif n lecɣal n ddin mass Hocine Hamiche akked ccix Said Klouaz. D asarag i yeḥder uneɣlaf n lmur n ddin akked lwali n Tizi Uzzu, syin ɣer-s, yella-d ufraq n udlis n usefhem n yinumak n leqran s tmaziɣt. Ma deg tmeddit n wass, tella-d tegnit n ccna n ṣṣenf n ddin sɣur terbaɛt “Et aqwa” n Draa Ben Khedda, adekkar sɣur lexwan n Ath Yahia akked wid n Ath Said. Ma ɣer taggara, tella-d tɣuri n yisefra n ddin sɣur kra n yimedyazen n lwilaya. Ma deg wass-nni n ssebt 02 deg waggur-agi n duǧamber 2017, yella-d deg tzeqqa tameẓyant n umezgun, ɣef 09h30 d asawen, wass n usḥbiber d useɛlem ɣef waṭṭan “cancer”, i d-yellan s usentel-agi: “Cancer et alimentation”, i d-thegga tiddukkla “El Fedjr” n lwilaya n Tizi Uzzu. Ma deg tzeqqa tameqqrant n uxxam n yidles, seg 10h00 d afella, xedmen timsikent ɣef wass agraɣlan i uḥareb mgal aṭṭan n Sida, i d-thegga tiddukkla Idles n Tmurt n Tizi Uzzu, ma ɣef 13h30 n uzal, yella-d usarag sɣur ddeqs n yimejjayen n waṭṭan seg sbiṭer Nadir Mohammed. Ma d sendiḍelli n lḥed, 03 deg waggur-agi n duǧamber 2017, yella-d deg tzeqqa tameẓyant n umezgun, ɣef 09h00 d asawen, wass n useḥbiber d useɛlem ɣef waṭṭan Sida, i d-thegga Tenmehla n tedwest tazayezt n lwilaya n Tizi Uzzu. Ma deg tzeqqa tameqqrant n uxxam n yidles, seg 10h00 d afella, smektan-d ass amaḍlan n yimdanen imeɛḍar, i d-tḥegga Tenmehla n Tigawt Timettit (D.A.S) n Tizi Uzzu.
Ahil n uxxam n umezgun
Ma d axxam n umezgun amniḍan Kateb Yacine, ad yili deg ttiɛad ula d netta, imi ad d-ilin deg-s wussan n umezgun wis 9 ara d-yilin d tajmilt i Muḥend u Yeḥya. D tazrigt tis rrebɛa n warraz n Muḥya i wureɣ n uḍris n umezgun ifazzen s tmaziɣt, ad d-ilin aseggas-agi ass n larebɛa 6 deg waggur-agi n duğamber 2017, akked uzekka-in n lexmis. Ad d-tili timsizzelt-agi deg tezrigt-is tis ukkuẓ n tmezgunt Muḥya n wureɣ i yuran s tmaziɣt deg uxxam n umezgun, dɣa ass n amhad i d-iteddun, ara d-banen yigemmaḍ n temsizzelt-agi, ad d-banen wid ara yawin tlata n warrazen imenza n useggas-agi.
A. A.