Ɣas ma yella acḥal tura segmi tettwafren termist (entreprise) ara iseggmen sin n yiberdan n tɣiwant n Ayt Smaɛel, rnu teffeɣ-d yakan ssuma swayes ara yemmag usenfar-a, maca lecɣal ulac ad ten-walin yimezdaɣ n taddart dayen bdan akken ad tthennin. Ɣef wawal n uselway n tɣiwant n Ayt Smaɛel, mass Ɛebdun Nasir, mi i t-nesteqsa tikkelt iɛeddan, yewwi-d tili qelɛen yiqeddicen tazwara n wayyur-a n ṭuber deg nella, rnu sɣur yiwet n termist i iḥercen akk deg Ayt Smaɛel. Lameɛna, iban-d d kra n uɛeṭṭel i ur nettwafham i d-igan annect-a n wakud d ilem war ma yemmug wacemma, netta ulac win ur neẓri belli tagrest (ccetwa) ur tettcawar ḥedd mara tɛewwel ad d-tger isurifen n sin-is n yiḍarren. Ad as-tiniḍ nennum dayen nekni akka i gan lecɣal-nneɣ, akken bɣun ilin wallalen i nesɛa, neɣ akken tebɣu tga tegnit deg nettidir. Ad d-nesmekti dakken iberdan-a iɣiwanen iɣef d-nettmeslay d win i iteqqnen Taɛinsert ɣer Tigratin ed Lmerj n Yiɣil s teɣzi n 1900ml. Ma d wis sin nniḍen yeɛna Taregragt-Bumejber-Burafaɛ s teɣzi n 1400ml. D iberdan i yettwasseqdacen aṭas ama sɣur yiɣermanen (citoyens) n tɣiwant, neɣ ula sɣur yiberraniyen tikwal.
Mhenni Xalifi