Yewweḍ-d useggas n tɣuri 2018/2019 ɣer taggara-s, dɣa sεeddan yinelmaden ddurt iεeddan ula d ikayaden, ma d tura yeggra-asen-d kan useɣti. Ma yella d inelmaden n yiswiren ineggura, ama d aswir wis semmus deg uɣerbaz amenzu, wis ukuẓ deg tesnawit neɣ d win n BAC, mazal ttṛaǧun-ten-id yikayaden ineggura, ara yilin d ṭṭuṛna deg ubrid d yimal-nsen. Inelmaden-a dɣa, fkan-as ddḥis ussan-a i tɣuri d uheggi i ukayad-a, lameεna ayagi d ayen i izemmren ad ten-iḍuṛ.
I wakken anelmad ur ihellek ara iman-is s ttexmam, d tɣuri ur d-nettawi agemmuḍ ahat, tidukkla taɣelnawt n tneflit d leqdic i tmetti n Yiderginen, txemmem ɣef waya. Daymi i d-thegga isragen uziggen n tɣuri d uwehhi n yiselmaden-a. Ayagi, i wakken ad asen-fken afus n tallelt i yinelmaden n uswir wis semmus deg uɣerbaz amezwaru, akked wid ara yessεeddin akayad n BEM. Ɣef leḥsab n teɣbalut-nneɣ, iselmaden ara asen-yernun timsirin, d wid yesεan tarmit deg useɣṛi, ssnen amek i d-ttasen yisteqsiyen.
Am wakken daɣen, ad ilint temliliyin-a d tagnit i wakken asen-kksen tuggdi seg ulawen-nsen, ad ssemɣin deg umkan-is asirem d teflest deg yiman. Ibabatan n warrac umren ayendin s leqdic-a igerrzen, ladɣa imi iselmaden-a ur d-ssutren ara lexlaṣ, acku llan wid yettfaṛaṣen tagnit i wakken ad d-jemεen aṣuṛdi. D ayen i yeǧǧan imawlan n warrac-a, snemmren iselmaden-a. Dɣa tenna-aɣ-d yiwet n tyemmat: «D ayen yessefraḥen nezzeh, imi d ayen ara d-yernun tabɣest i warrac-nneɣ, nessaram timnaḍin-nniḍen ad ddment taɣiwant n Iderginen d amedya».
K. K.