Taqcict temmeγ kan γef wallen-is tefka-as-tent, tewwi ddheb-nni. Afeḥḥam yewwi-d allen-nni yeqqel γer uxxam, taqcict tessuter γer tlawin-nni aceqquf n times, dγa wwint-as-t-id, teddem cwiṭ di ccεeṛ-nni i as-yefka uzrem tesserγ-it, ccεeṛ-nni yefka-as asmi i t-tufa deg ubrid yegzem-it ugris, iεenna deg-s ad t-tejmeε ad as-yer lxiṛ mačči d ayen i deg ara tendem. Teddem tewwi-t yid-s γer uxxam, teffer-it deg ukufi almi d asmi yeḥma lḥal, tessufeγ-it-id, akken yekker ad iṛuḥ, yefka as cwiṭ si ccεer-nni n temgerḍt-is yenna-as : ‘’mi t-teḥwaǧ ad t- tesserγ’’. Ihi, tesserγ ccεer-nni n uzrem almi ha-t-an yewweḍ-d tawwurt, yenna-as i teqcict-nni: ‘’ Dacu i tebγiḍ?’’ Taqcict tenna-as: ‘’ Aqli-k la tettwaliḍ liḥala-w’’. Yenna-as: ‘’Ddem allen-nni, err-itent γer wallen-im’’ Dγa yemceḥ-as-tent abrid akka, abrid akka, uγalent wallen n teqcict xiṛ n zik, taqcict tefṛeḥ s wallen-is, tenna-as i uzrem: ‘’Σṭi-k ṣṣaḥḥa, aqli-k teqḍiḍ ddin-ik’’. Tekker teqcict, teṭṭef abrid-is γer taddart n ccix, tewweḍ deg yiḍ tesṭebṭeb, tessuter tin Ṛebbi. Yeffeγ-d ccix d tmeṭṭut-is, nettat ur tt-teεqil ara axaṭeṛ tban-d kan d tinebgit n Ṛebbi, yessekcem-itt ccix γer uxxam. Σica, ur tebγi ara mi tt-yessekcem, teǧǧa-tt di tesga γer tama n umeksa-nni iεelqen. Akken i as-d-wwin ad tečč tugi, tenna-asen: ‘’Ur tetteγ ara alamma tessersem-d lxelq-inna ad yečč’’. Ccix-nni yugi, yenna-as: ‘’Wahin d akeddab d axeddaε d wahin i d amkan-is !’’ Tenna-as: ‘’ Yirbeḥ a Sidi, dacu mi čči&gamma,; rret-t s amkan-is’’. Ddmen, sersen-d ameksa ad yečč lqut netta d tnebgit n Ṛebbi, dγa tebda la d-ḥekku taqṣiṭ-is seg wasmi d tebda ar almi d-tewweḍ γer din-a. Ccix-nni yefhem yakk taqṣiṭ amek tella. Yenna-as d acu i tebγa ad as-texdem tura i Σica. Taqcict tenna-as : ‘’Ur tt-neqqeγ ara εlaxaṭeṛ d uletma’’.
Tettkemmil Seg tgemmi n teqbaylit