Taɣiwant n Ait Aissa Mimoun i d-yezgan deg ugafa n lwilaya n Tizi Uzzu, i yebaԑden fell-as azal n 15 km. Taɣiwant-agi ideg llant 23 n tudrin, tettwassen iseggasen-agi ineggura s lexsas meqqren deg waṭas n yiḥricen d yisenfaren yemgarden n tudert tatrat, gar-asen: lgaz n temdint, yir liḥala n yiberdan, Internet, aman n tissit…atg. Acu kan tikkelt-agi, yerna-d ula d aɣbel n ttawilat n uṣiweḍ ɣer yiɣerbazen. Mazal imezdaɣ n 23 n tuddar n tɣiwant-agi n Ait Aissa Mimoun, ssuturen tuɣalin n lkiran yettawin ɣer yizɣerbazen, anda ttafen iman-nsen inelmaden gar sin wuguren. Aɣbel amezwaru d lexlaṣ i ttxeliṣen yal ass gar 80 ar 100 DA i, ladɣa wid yeqqaren deg tesnawiyin. Ma d aɣbel wis sin d ttiwḍin s aɣerbaz ɣef 08h n sbeḥ. Imi acḥal n tikkal ur ttawḍen ara inelmaden deg lwaqt ɣer uɣerbaz. Sseba akk n wanect-a ; d ulɣu-nni i d-yefka useqamu aɣarfan aɣiwan (A P C) n Ait Aissa Mimoun, ideg yekkes akk lkiran yettawin ama ɣer tesnawit n Muḥmed Wediεi yellan deg Teplakin, ama d tin yettawin ɣer tesnawiyin n Tizi Uzzu, gar-asent- Rabaḥ Sṭembuli, Lxensa, Faḍma n Sumer… Ad d-nesmekti kan, d akken lkiran-agi yellan ttawint ɣer tesnawiyin, nnefṣ tettxelis-it tɣiwant, ma d nnefṣ-nni-niḍen, ttxelisen-t inelmaden s waggur. Acu kan seg wass-nni lhed mi uɣalen warrac ɣer tesnawit, ulac lkiran n uṣiweḍ. Ma d tid yettawin ɣer yiɣerbazen ilemmasen (CEM), yettabaεen ɣer tɣiwant, ḥebsen ixeddamen-nsent ɣef lexdma ɣef teɣzi n 3 wussan, seg wass n ltnayen armi d lexmis-a yezrin. D ayen i yeğğan inelmaden deg uɣerbaz n sin yimeɣrasen Tellal Muḥend n Uqawej yeqqaren ad ruḥen azal n 5 ikilumitren ɣef uḍar. D ayen yeğğan imezdaɣ n tɣiwant-agi, daɣen, ad d-gren tiɣri yerna ad ssuturen deg wid teԑna temsalt, gar-asen imeḍberen n tɣiwant Ait Aissa Mimoun, iɣef yella ɣef uqerruy-is Mass Aki Chabane, i wakken ad d-afen tifrat i wugur-a n uṣiweḍ.
ADAOUN Abdelghani