I lmend n tirza tadelsant s yisem Aẓeffun agerruj n tmusni i d-yellan seg wass-nni 30 cutember ar umenzu n tuber 2016, agraw n yinelmaden n uɣerbaz Lɛerbi At Ɛmer d wid n tesnawit Si Lḥasen Utaleb n At Yanni , rzan ɣer Uẓeffun anda rran tajmilt i Tahar Ǧaɛuṭ d Mḥemmed Isyaxem.
Di tazwara, uɣen ameccaq ɣer taddart n Tbuduct, anida i sen-d-telli tiddukla tadelsant i irefeden isem «Mḥemmed Isyaxem» tiwwura-s s lferḥ d uɛuzzu. Mḥemmed isyaxem d argaz n yidles, yufrar-d s taklut-is d cbaḥa n tfelwin-is. Akka i tettunefk tegnitt ad zṛen axxam-is, maca sḥasfen aṭas yinelmaden imi t-in-ufan yeɣli, yuɣal d idɣaɣen.
Dina, i d-tusa tikti i yinelmaden-nni, ad ssunɣen axxam-nni yeɣlin, ara yilin d azamul n usḥissef-nsen. Deg usunneɣ-agi, ad ten-iɛiwen unaẓur n teklut mass Ǧamal Sennan.
Syin, uɣen abrid ɣer taddart n At Ṛhuna, din zran-d lemqam yebnan s uẓru. Ayen yessewhamen aṭas, d amek mbabben iẓra nni, wa ɣef wa.
Azekka nni, uɣalen ɣer Ulxu, taddart n Tahar Ǧaɛut. Rzan ɣef uẓekka-s, yerna glan taḍbiqt n rxam i ɣef uran awal n uneɣmas n tidet «Ma tessusmeḍ ad temteḍ, ma temeslayeḍ-d ad temteḍ, Ihi… Ini-d temteḍ», i wakken ad yeḍbeɛ wawal-is deg wallaɣen d wulawen am wakken yeḍbeɛ ɣef teḍbiqt-nni n rxam.
Syin, kemmlen tirza-nsen ɣer taddart n yinaẓuren Saɛid d Muḥemmed Ḥilmi. taddart-agi-nsen, tettwassen s yexriben i d-yeqqimen si tallit-nni n Ṛuman. Akka i yekfa yinig n yinelmaden n At-Yanni ɣer lɛerc n Uẓeffun, d asmekti i yinaẓuren d yimusnawen n tmaziɣt, d timlilit d umezruy-nsen amaziɣ.
Mekioussa Boumendil