Tezga-d tɣiwant n Ait Chafaâ seg ugafa n usammer n ugerzu n Tizi uzzu. Teṭṭafar ɣer Uzeffun, tlul-d aseggas n 1985; ha-t-an, tura, zrin fell-s 31 n yiseggasen degmi i d-tella.
Maca ar ass-a, ur tban ara d taɣiwant: yal tallit tettrajju ahat ad yili uselway-is ara as-d-yesbanen tafat fell-as xas akken tesɛa tizemmar akken ad d-tifrir gar tɣiwanin akk n Lezzayer. Ɣur-s ilel; snat n teftisin s wazal-nsen, Sidi Xlifa d lǧennet tameẓyant, tiẓegwa am Tigrin, Tala Meqqran, Bu-xruf, izuɣar, idurar , tiɣbula n waman …atg. S yigerrujen-a, yerna At caffeɛ, ha-tt-an gar tɣiwanin tineggura n Tizi uzzu, neɣ, waqil, d taneggarut. Ma nefka-d kan kra n yimedyaten ɣef waya , ad naf ar ass-a, abrid n ugerzu uṭṭun 159 mazal-it akken i t-id-teǧǧa Fransa. Yeqqim d udyiq, dɣa mi ara d-mmlilent snat n tkeryas, ilaq yiwet ad teḥbes. Mačč, daya kan, ula 60 n tmezduɣin i yettubnan, ugar n 5 n yiseggasen aya, ha-tent-an qqiment akken, ttrajjun-tent yimezdaɣ am wayyur n lâɛid. Rnu ɣur 100 n tḥuna i yuɣalen d axrib, ar ass-a ur tent-fkin ara xas akken sutrent-tent yilmezyen n tɣiwant-a, acḥal aya. Ula d tazeqqa n usejji yellan deg At caffeɛ talemmast, nezmer ad d-nnini tbedd kan. Ula d imejjayen yellan deg-s, ttawint-ten ɣer Uzeffun neɣ ɣer Uɣrib imi tettweḥqer tama-a. Wigi, d kra seg waṭas n yiɣeblan, acku amer dɣa ad d-nebder uguren n tɣiwant-a, ur nettfak ara akk. Ass-a, imezdaɣ-is ttinigen deg-s, tteffɣen-tt, acku yegzem-asen usirem i unegmu-ines. Ma d wid yeqqimen deg-s, ttemdeggaren d wuguren n yal ass. Wiss ahat ad d-glun yiseggasen i d-itteddun s kra n umaynut, ladɣa tifranin n tɣiwant 2017, gar-neɣ yid-sent aseggas kan. Nessaram ad d-glunt s tifrat.
Tamsaout Tarik