Ur yeǧǧi amḍiq, ur yeǧǧi taddart neɣ ssuq ! Wagi d Muḥand u Yidir, fell-as talwit n yillu, imi yensa deg seggas n 2005. Amedyaz-agi, aṭaṣ i t-imetlen ar Si Muḥ u Mḥand imi iteddu aṭaṣ, yettruḥu seg taddart ar tayeḍ, seg ṣṣuq ar wayeḍ deg krad n lwilayat-agi: Tubirett, Tizi uzzu lakked Bgayet. Yezzuzur deg yal amkan anda yewweḍ isefra-ines…qarriḥet, imi imi-is amzun akken d-rṣaṣ i d d-ittefɣen, ur ittefer ara deffir imeslayen, d-amedyaz yettruḥun srid ar yiswi-ines ! Deg tmedyazt-ines nettaf aṭaṣ n tsertit. Aṭaṣ daɣen deg isefra-ines i cnan inaẓuren. Muḥand u Yidir yeǧǧa-d ilem deg tamiwin anda irezzef, deg leswaq anda tezzin fella-s medden iwakken ad slen isefra-ines, anda i d d-yekkat deg waṭaṣ n yimdebren d yisertiyen yellan ama deg dabu neɣ deg tama imgaraden. Deg ssuq n Tazmalt anda i t nwala aṭaṣ n tikkal deg isegassen n 1990, d’da Muḥand yettlusu akustim s tekrabaṭ, deg fus-is akertabl lakked…tadebuzt! Tagi yettadam-itt-id iwakken ad issefru, yettwahi syes amakken yebɣa imeslayen-is ad « kecmen » bessif ɣer wallaɣen n-imesfliden ! Yeččur d ttaḍṣa amakken d reffu. D’da yidir yettneqlab am isefra-ines! Deg sefra n d’da yidir, ulac amḍiq i…tayri. Iḥemel ḥaca tasertit, d wayen icudden ar yidles amaziɣ! Dayen ur nessefraḥ ara tikwal kra n-imesfliden yellan magl tikta ines. Aṭaṣ n tikkal i yemceččaw s yiles d kra n yemdanen ɣef tsertit! Maca ayagi ur yerri ara amedyaz-agi ar deffir ! Aṭaṣ n-inaẓuren d yisertiyen id yedda d’da yidir garasen Ferḥat imula. Fella-s yenna-d yiwet n tikelt s tedsa: » Ferḥat, itteffer tiqerɛatin n Pikho seddaw n srir asmi yella di tsedawit! ». Muḥand u yidir mači d-amedyaz kan i yella, ula d-imeslayen-is seḍsayen! D-acu amedyaz-agi ur nesɛi amtil yensa deg seggas n 2005. Aṭaṣ deg tudert-is ur nessin ara, imi ulac kra i d ibanen fella-s, acku yettwattu am imedyazen niḍen. Ulac war at id d-ismektin imi iruḥ tewwit tatut yettawin inaẓuren n t’murt nneɣ merra !
Syphax.Y