Am wakken yella lḥal deg tudrin n tmurt n yizwawen s umata, timecreḍt d yiwen n wansay (lɛada) amaziɣ i yellan seg umezruy aqdim, mazal-it ar tura. Deg-s lmeɛna n tudert d tdukkli gar lɣaci, akken ad ṭṭixren seg tikkelt i tayeḍ i kra n tlufa tirqaqin, ad zdin kra n lewqat n lferḥ d talwit. Dɣa, ahad-a (ttlata) kan iɛeddan, yezzi-d useggas ɣef zzerd i yemmuggen ilindi deg taddart n Ayt Tɛisiwt d Tecruft, taɣiwant n Ayt Smaɛel. Kkren ihi yimezdaɣ ulsen-as-d i lewziɛa-nniḍen deg lǧamaɛ n Tizi n Lwali akked lǧamaɛ n Ucruf seg tsebḥit-a. I lmend n waya, ttwaheggan-d kra n yizgaren i tmezli akken ad d-iqid uksum i wat tamnaḍt merra. Maca, ilaq ad d-nini belli ssuma n tunet, am yal tikkelt, aṭas i tt-iwalan bezzaf teɣlay ɣef texriḍt-nsen imi i tt-ssalin wid i d-yelhan d leqdic ɣer 2100 n yidinaren i yiwet. Almi dɣa ttuḥettment kra n twaculin ad d-aɣent azgen n tunet. Meḥsub ufant win ukud ara d-cerkent yiwet. Aya, ɣef leḥsab n yimezdaɣ. Yekka-d segmi drus n medden i iɛudden, wamma tili terxes cwiṭ tunet. «Teɣlay d tidet tunet n uksum aseggas-a. Maca nenwa ad d-naɣ seg zzerd akken ad nesɛu amur-nneɣ dinna». I aɣ-d-tenna yiwet n tmeṭṭut, imi aṭas i yettwalin lfal deg tlufa-a. Ayen yessefraḥen, ahat aṭas, seg zzerdat-a i mazal sekfalent-d tudrin, dakken kra n win i ixussen seg tama n temɛict, ur yezmir ad ixelles tunet-is, d agujil d amuḍin neɣ d aẓawali, yettsiḥi-as-d umur-is am netta am wiyaḍ. Seg waya ara d-nefhem iswi amezwaru alsan n wansay-a aqbur.
Kaisa Khalifi