Tanmehla n yidles, tanmehla n Uxxam n yidles Mulud At Mεemmer, tasdawit Mulud At Mεemmer, Tiddukla tadelsant “Said Boulifa” n Adni d tiddukla tadelsant “Isseɣ” n Souama. Suddsen-d ass-nni n lḥed, 10/10/2016, yiwet n tezrewt deg uxxam n yidles Mulud At Mεemmer n temdint n Tizi Uzzu, ideg i d-wwin awal sin yiselmaden n tutlayt n tmaziɣt deg tesdawit n Tizi Uzzu: Said Chemakh d Ali Bekhti ɣef ‘’Tesnarayt n uselmed n tutlayt n tmaziɣt’’, ɣer umaru ameqqran Si Amar ou Said Boulifa. Meslayen-d ɣef wayen yura d wayen i d-yefka i tutlayt n tyemmat, d tarrayt-is deg uselmed n tmaziɣt.
Am wakken daɣen, i d-tella temsikent d usenεet n yidlisen yura Boulifa, d wayen tura tɣamsa fell-as, ama ɣef tudert-is, ama ɣef tira-s neɣ tmussni-is i d-thegga tiddukla tadelsant yewwin isem “Boulifa”. Tella-d, diɣen, yiwet n tnigit sɣur Boulifa Chabane, yiwen uεeggal gar yiεegglan n twacult n Said Boulifa, u d aεeggal, daɣen, deg Tiddukla tadelsant “Boulifa” n taddart n Adni, deg tama n Larbâa Nath Irathen (LNI).
Ma ɣer taggara n wass, yella-d usenεet n yiwen n usaru i d-yewwin ɣef tudert n umaru-agi ameqqran, d wayen akk yura. Ad d-nesmekti kan belli Si Amar ou Said Boulifa, ilul deg useggas n 1961 deg taddart n Adni, deg tama n Larbâa Nath Irathen (LNI). Yeɣra aṭas n leqran d tefransist. Gar yimezwura i ixedmen deg wannar n tamziɣt, yura aṭas n tewsatin n yidlisen. Gar wayen yura deg tsekla tamaziɣt, ad d-nebder, ammud n tmedyazt n teqbaylit, Lezzayer 1904. Deg tesnalsit: tarrayt n tutlayt n tmaziɣt (timsirin n useggas wis sin), Lezzayer 1913. Deg umezruy “Djurdjura à travers l’histoire : depuis l’Antiquité jusqu’en 1830», Lezzayer 1925. Yemmut ass n 08 deg yulyu 1931.
Adaoun Abdelghani