Am yal taddart neɣ tamnaḍt seg temnaḍin n Leqbayel, yal ta amek tesfugul ansayen-is ( Taεacurt, Lmulud, Yennayen…). Ass-agi, nerza ɣer snat n tuddar deg tɣiwant n At Xellili, i wakken ad nẓer amek sfugulen Taεacurt.
Deg taddart n At Xir, taɣiwant n At Xellili deg tama n Meqlaε i ibeεden azal n 60 n likilumitr ɣef temdint n Tizi Uzzu, yal aseggas txeddem taεacurt. Tebda ass-nni n larebeεa, 12/10/2016 almi d 15/10/2016, deg tlemmast n taddart-agi. Tettwassen taddart-agi s ufexxar, imi xedmen, yakan, tazrigt tamezwarut n tfaska n ufexxar deg taddart-a, seg 01-03/06/2016, imi, daɣen, azal n 70 n twaculin-is, xeddment afexxar. Tiddukla tadelsant “Isselqam n Talaɣt” n taddart n At Xir d tesqamut n taddart-agi, tanmehla n yidles n Tizi Uzzu, dayra n Meqlaε d tɣiwant n At Xellil, suddsen-d yiwen n leqdic adelsan, ideg sfuglen ansay n Tεacurt. Deg-s, gan aṭas n temsikniyin: lfeṭṭa, idlisen, tamemt, afexxar, tiqendyar n leqbayel, ijeqduren n usɣar, zzit uzemmur, allalen iqburen…atg. Am wakken, daɣen, yella ccna, isefra, ticeqqufin n umezgun, llan ula d iḍebalen. Deg wass amezwaru, 12/10/2016, tella-d yiwet n tejmilt i uḍebbal ameqqran n taddart, “Dda M’barek Tidaf” ad t-yerhem Rebbi. Dɣa sersen tameqqunt n yijeğğigen ɣef uẓekka-as, ɣef 10h n ssbaḥ. D tinagiyin ɣef tudert-is sɣur yimeddukkal-is d twacult-is. Ma deg sin wussan-nni-nniḍen, 13-14/10/2016, llant-d aṭas n temsikniyin n lfeṭṭa, idlisen, tamemt, afexxar d waṭas n trebuyaε n yiḍebalen d kra n tezlatin sɣur aṭas n yifennanen. Ma deg wass aneggaru, 15/10/2016, tella-d yiwet n tejmilt s wazal-is i uḍebbal n taddart “Dda M’barek Tidaf», ideg wwtent aṭas n trebuyaε n yiḍebbalen. Syin akkin, kfan-tt s tmeɣra meqqren, ideg ccnan aṭas n yinaẓuren gar-asen: Karim Khelfaoui, Remdan Mechache, Yousef Guerbas… Di tirza-nneɣ ɣer taddart-agi, nemlal-d aselway n tiddukla tadelsant, Karim Taguine, yenna-aɣ-d: ‘’ad inniɣ Taεacurt tamerbuḥt i yal azzayri, ncallah s kra win i d-yusan ɣer dagi, ɣer taddart-nneɣ, ad as-yeεjeb lḥal. Nekni, si tama-nneɣ, nexdem akk ayen iwumi nezmer, i wakken ad d-asen ferḥen , u ad uɣalen ferḥen. Ad inniɣ tanemmirt s tussda i widak akk i d-iruḥen d wid akk i d-yefkan afus n tallelt i wakken ad d-tili tmeɣra-a meqqren. Tanemmirt, daɣen, i uɣmis n yimaziɣen. Ad d-nesmekti belli d tiddukla tadelsant “Isselqam n talaɣt” n taddart-agi n At Xir, i d-iheggan leqdic-agi adelsan. Tebda leqdicat-is idelsanen deg useggas n 1991. D nettat i d-ittheggin yal aseggas tameɣra-agi meqqren. Ma deg taddart n Leɣrus, taɣiwant n At Xellili deg tama n Meqlaε. i ibeεdn s wazal n 55 n likilumitr ɣef temdint n Tizi Uzzu, yal aseggas txeddem timecreḍt deg tεacurt. Taseqamut n taddart d imezdaɣ-is, suddsen-d yiwet n lewziεa, ideg seččen akk taddart s uksum. Anida i d-tella yiwet lweεda, ideg i d-fkan At taddart 2 yizgaren i wakken ad ten-zlun d waṭas n yidrimen ara tessexdem taddart deg useddu n yisenfaren n unegmu. Ass-nni n taεacurt, 12/10/2016, εeddan-d akk ɣef yixxamen n taddart s tawwurt s tewwurt, jemεen timellalin d ufḍir (aḥeddur), u ad rnun idrimen. Syin akkin, wwin-ten akk ɣer tejmaεt n taddart. Aksum-nni, ferqen-t ɣef wat taddart, yal yiwen yewwi amur-is ula d timellalen d ufḍir yal yiwen s leḥq-is. Ma d idrimen-nni, gan-ten deg texriḍt n taddart, mi ten-ḥwajen ad ten-id-kksen. Ad d-nesmekti belli taddart-agi, tettekki deg temsizzelt-nni n tezdeg “Aissat Rabah” n lwilaya n Tizi Uzzu, deg tezrigt-is tis 4.
Deg tɣiwant n Ain El Hemmam
Am yal aseggas, imezdaɣ n Michli sfugulen taɛacurt , ama s tmezla n yizgaren neɣ n wakraren. Ttawin lewɛadi ɣer lemqamat am Jeddi Mengellat neɣ Ccix Muḥend , imi seg zik ttasen-d ula seg temnaḍin nniḍen, ttasen-d ula seg Yiɛeẓugen , seg Tizi Uzzu, seg Lezzayer. Aseggas-a, yemxalaf ɣef yiseggasen-nniḍen imi seg zik lemqam n CcixMuḥend yettaɛmar, aseggas –a ikemmel yeɛmer, Dda Lḥusin Ayt Aḥmed yettwanṭel dinna , sdat tewwurt n lemqam n jeddi-s , fursen tagnit wid ur d-nusi ara asmi yenṭel imi ulac ula d abrid imir, dɣa d tagnit n zzyara n lemqam d uẓekka ɣef tikkelt. Yerna mačči ass n tɛacurt kan i d- ttasen ɣer din. Seg wass n tɛacurt, lɣaci, ur ḥebbsen alamma tezri ddurt neɣ snat : yal wa d acu i d-yettawi ɣer dinna ; llant tlawin i d-yerban, ttawint-d igerdan , suffuɣent lwaɛda, tarbut n seksu tameqqrant s uksum d imenda , ttawin-d daɣen tiẓidanin ; llan wid i d-yettawin akraren imuddiren, zellun-ten dinna , deg uxxam n Ccix ; ttasen-d wid yuḍnen, deɛɛun akken ad ḥlun. Wid i d-yettasen mi kecmen ɣer lemqam, ad sersen idrimen , ttubbun ɣer wanu ( lbir) i d-yezgan tama n wadda n uxxam n ccix, ttagmen-d aman, tella dinna tekwat saɣayen ticemmaɛin, ttalin ɣer twacult n Ccix, daɣen, i d-yezgan usawen nnig lemqam, ttawwin-d lfal, lemlaḥ d ssker i lbaraka akken id –qqaren seg leɛwayed n lejdud, yerna aṭas i yettamnen s zzyara-agi, imi d yiwen wansay seg wansayen n leqbayel yellan seg zzman aqbur.
Adaoun Abdelghani / Zakia Ben yahia