Sidi Xaled Abdella, d mmi-s n Abdella Weḥsen si taddart n At Buyeḥya. Izdeɣ, iceyyex di taddart n At Buɛli deg lɛerc n At Dwala. Sidi Mḥed Lḥaǧ, netta si taddart n At Lḥaǧ deg At Maḥmud. Asmi, ikker ad d-iḥuǧ, irza ɣer taddart n At Buyeḥya ɣer Sidi Abdella Weḥsen, amɣar lbaraka, akken ad t-id-iẓur send ad iruḥ s axxam n Rebbi. Yenna-as : ‘’aqli bɣiɣ ad ruḥeɣ ɣer uxxam n Rebbi, bɣiɣ ad tedduḍ yid-i’’. Yerra-as-id : ‘’imi d annect-a i tebɣiḍ, ruḥ kan ɣer mmi Xaled, d netta i izemren i tigi . Sidi Mḥend Lḥaǧ, yuder srid ɣer Wat Buɛli, anda yettili Xaled, yeẓra-t-id. Netta yenna-as-id : ‘’ruḥ, ad isahel Rebbi fell-ak, ayen illan gar yifassen-iw, ur ak-ttɣulaɣ ara yis-s’’. Sidi Mḥed Lḥaǧ, yuɣ abrid n lḥiǧ, yedda deg uɣeṛṛrabu d lḥeǧǧaǧ. Mi wwḍen ɣer tlemmast n lebḥar, ibda la iḥeccar yillel. Lemwaji simal rennunt-d, simal ttimɣuṛent, alammi aɣeṛṛabu yeččur akk d aman. Ibda la ibella.
Lḥeǧǧaǧ akk bdan, ssawalen, nedhen s wid d-iddan yid-sen slid Sidi Mḥend Lḥaǧ. Aɣeṛṛabu simal la ibellaɛ. Neṭṭqen ɣer-s, nnan -as: ‘’i kečč ur tessawaleḍ ara?’’ Dɣa Sidi Mḥend Lḥaǧ, irfed ifassen-is s igenni, yendah s Sidi Xaled Abḍella, ibda la yessawal.
Netta, Sidi XaLed Abḍella, Yuɣ-it lḥal di taddart-is, deg At Buɛli, ittẓalla lǧamuɛa. Imiren, Tala-Ixlan ur sɛin ara Ccix, ttẓallen ɣer-s deg Wat Buɛli. Qqaṛen-d, Ccix ibedd sdat imẓulla, tafekka-s tella, netta ulac-it. Israffeg deg yigenwan ɣer wanda ibellaɛ uɣeṛṛabu, isellek-it-id. Mi-d yuɣal lexsen-d akk yijufaṛ-is. Imẓulla n TaLa_Ixlan i illan din, ttaḍsan mi walan Ccix yettqudduṛ d aman; qqaṛen gar-asen s teɛrabt : “ Bulɛlih” ! Seg i ten-iwala ttaḍsan fell-as, inṭaq, yenna-asen : ‘’ihi, ɣileɣ mačči akka!
Ruḥut !
Ddyun, war timira
Ayla ar tiwwura
Ad tettem ur trewwum
Ad txeddmem ur tɛeyyum .
Ɣef wakken d-qqaren, ayen idεa Ccix iffeɣ. Ass-a, taddart n Sidi Xaled Abḍella ssawalen-as At Buɛli.
Lasheb Ramdane