Tikkelt-agi, gan tajmilt i 4 yineɣmasen n lwilaya n Tizi Uzzu, yettuneḥsaben seg tgejda n tɣamsa tazzayrit i mazal ttidirin gar-nneɣ ar ass-agi. Ineɣmasen-agi d wigi: Belkacem Messaoudi, Said Freha, Mohamed Haouchine d Rachid Hammoutene.
Taneɣlaft n yidles, tanmehla n yidles, tanmehla n uxxam n yidles Mulud At Mεemmer, d tesqamut n leqdicat idelsanen d inaẓuren (C.A.C.A) n temdint n Tizi Uzzu, suddsen-d ass-nni n sed 22/10/2016 yiwen leqdic adelsan s wazal-is, deg uxxam n yidles Mulud At Mεemmer n Tizi Uzzu, i lmend n usmekti n wass aɣelnaw n tɣamsa. Tikkelt-agi, gan tajmilt i 4 yineɣmasen n lwilaya n Tizi Uzzu, yettuneḥsaben seg tgejda n tɣamsa tazzayrit i mazal ttidirin gar-nneɣ ar ass-agi. Ineɣmasen-agi d wigi: Belkacem Messaoudi, Said Freha, Mohamed Haouchine d Rachid Hammoutene. Fkan-d aṭas i tɣamsa tazzayrit s umata, d tɣamsa taqbaylit s wuzig. Ma dayen yerzan ahil yettwaxedmen i lmend n usmekti-a, yebda leqdics wudem unsib ɣef 10h, imi gan deg tzeqqa n temsikniyin aṭas n yimagraden n tɣamsa i yuran s timmad-nsen, d waṭas n tugniwin (ttsawer) n yineɣmasen-agi d tmeddurin-nsen. Am wakken, daɣen, i d-yella usenεet n yiwen n usaru i d-yewwin ɣef tudert-nsen d imahilen-nsen deg unnar n tɣamsa, d wayen akk i d-yezzin i wass aɣelnaw n tɣamsa. Ma ɣer tmeddit n wass, tella-d yiwet n tigda timedwart (table ronde) ɣef tudertd imahilen n ukuẓ-agi n yineɣmasen imeqqranen. Ad d-nesmekti kan belli, Belkacem Messaoudi akked Said Freha d ineɣmasen n rradyu, ma Mohamed Haouchine d aneɣmas n tɣamsa yura, ma Rachid Hammoutène deg tin yuran (iɣmisen) akked rradyu.
Aaoun Abdelghani