Deg wass-nni n lexmis almi d tagara n ddurt , tella-d tmeɣra n tazart deg Wat Jlil, lɛerc n Yiẓnagen , lwilaya n Bgayet. Azal 75 yifellaḥen i d –yesnaɛten leṣnaf n tazart yemxalafen i d-lwin di tferkiwin-nsen: Ajanjar, Taɛemrawit , Imelwi…atg. ‘’zik-nni, asmi yella lxir , mi ara yeffeɣ ufellaḥ ɣer lexla, yettawi yid-s uraw n yiniɣman di lǧib, ur yesnagar ara alma yuɣal-d s axxam-is tameddit , deg-s leqniɛa’’ i d-yenna yiwen n umeksa n temnaḍt-agi. Di tezrigt tis 05 n tikkelt-agi, d tamerkantit, ataṣ n lesnaf-nniḍen lɣella s wayes tettwassen temnaḍt-agi, ama d zzit n uzemmur, tament , awren, ifelfel , tiẓemmit d yisufar nniḍen. Am wakken i d-yella wawal sɣur kra n yimussnawen akked d yimḍebbren n texxamt n tefellaḥt n Bgayet ɣef wazal tesɛa lɣella-agi deg usnerni n tdamsa n tmurt. Ṛeggmen i yifellaḥen ad asen-d fken allalen swayes ara snernin deg usefti d lxedman n tneqlin, am uledduy n yiberdan ɣer tferkiwin i ibeɛden d lebni n yibusal n waman i tissit n yixulaf lawan n unebdu…atg. Seg wakken tettussenef tazart n Wat Jlil gar tid i d-yufraren ɣer tama n tazart n Wat Imɛuc, ayɣer ur tettili ara timenziwet-is deg leswaq igraɣlanen, imi ddula tefka, yakan, tesriḥ n usuffeɣ n tazart n Wat Imɛuc d temnaḍin i as-d-yezzin ɣer tmura n berra .
Brahim .Ben