Yiwet n tikkelt, Lḥaǧ Salem si taddart n At Yidir isuddes-d yiwet n tmeɣra n rcel. Issawel i yimeddaḥen ad d-asen ad zenzen lḥenni. Yuli Aɛmer Awmer d Saɛid Awdi si taddart n At Buɛli, yuder-d Muḥed u Saɛid n At Weɛrab d yimeddukal-is si Taddart Ufella, ruḥen-d ula si Tgemmunt Ukerruc. Mlalen deg uxxam n tmeɣra. Sersen-asen-d lmetreb, iččur d timellalin, lesfenǧ d uḥeddur. Syin, bdan yimedyazen, znuzun lḥenni. Ttawin-d isefra. Mi ikfa yiwen, ad yuɣal wayeḍ, ttemjadalen akken s yisefra alammi Saɛid n At Weɛrab ibda-d yiwen usefru:
Iwtal illan di terga
Tura ɛazmen ad d-ḍehren…
Din indeh Aɛmer Awmer.
A syadi lemmer tfehmem
Tezram-aɣ nekni d sidi-k
Nekni d iḥeddaden ma tɛelmeḍ
Nusa-d ad nečč aksum-ik
Mi akka tesqewqiweḍ d iles-ik tettenḍeḍ
Alda yeɣli ar icimi-k
Ara tekreḍ ara tnedmeḍ d wayagi thedreḍ
Ara takiḍ deg yiman-ik.
Dɣa Saɛid n At Weɛrab iggugem, iruḥ issusem. Aɛmer Awmer d yimedukkal-is qerben ɣer lmetreb-nni bdan la tetten.
Ramdane LASHEB