Iweǧǧiben d ansay aqdim ɣer leqbayel, d ass amenzu n tyerza ɣer yifellaḥen, ttmagaren-t medden s lfuttuḥ n lxir, ssaramen ad yelhu useggas n tyerza am wakken sfiliten, ad yili lxir d ṣṣaba deg yigran.
Gar wayen xeddmen lejdud, nezmer ad d-nebder aya: sufuɣen izgaren, ad tezwir tyuga n uxxam At lxir n taddart, ad teddu tmeṭṭut tameqrant n uxxam, ad tawi aɣerbal deg-s remman , ibawen , tajilbant, irden , tazart d lmesbaḥ. Ad dehnen tagersa , ma d arrac ad ṭṭfen deg ufus n tsilet. S umata, akka i d-yettili uɛeǧǧeb di tmurt n leqbayel . Imezdaɣ n taddart n Teslent di tamnaḍt n Ssumam, di tɣiwant n Yiɣram gar wigad i mazal ṭṭfen di leɛɛwayd. Ass-nni, 26 di tuber yezrin i weǧben , muggren ass amenzu n tfellaḥt. Amek i d-yella uweǧǧeb di taddart n Teslent ? Ddurt uqbel aweǧǧeb, nnejmaɛen deg taddart, msefhamen i wakken ad d-ssufɣen tirbuyin n seksu n ubisar ɣer umraḥ n taddart iwumi qqaren ‘’Sidi Abdjlil d Uɛetman’’ ass imensi n iweǧǧiben , yal axxam ad d-inawel seksu n temẓin neɣ n yirden, ma ulac d smid , abiṣar ad yili d asafar agejdan . «Nebɣa ur yettemgarad ara nwal gar uxxam d wayeḍ , acku iswi–nneɣ d ajgugel deg wansayen n lejdud , mačči d timsizzelt gar yixxamen, anwa ara ad d-inawlen a xir n wayeḍ» i d- yenna Mass Boualem Iskounen s yisem-is d lɛaqel n taddart . Imi i d-yewweḍ lawan-nni n usečči , mlalen-d Wat taddart, win-d tirbuyin n ubiṣar, llan wid i d-yusan ula si berra n taddart, ttidiren di temdinin-nniḍen. Gar-asen, ad naf Mass Buyusef i d-yusan seg Uqbu. Nnig n 70 n yiseggasen-aya i yezdeɣ di temdint-nni , maca yal mi ara ad d-tili tegnit am tagi, yettas-d igellu-d s tarbuyt-is. Mi i t-nessteqsa , yenna-k : «deg tignatin am tigi, tettuɣ abɛad ɣef taddart. D akal akked wansayen n lejdud i yi-d yessawalen yal tikelt . Rnu, ttawiɣ-d arraw-iw i wakken ad myussanen d Wat taddart. ‘’Aẓar yettabaɛ tara’’…» Imensi ass n yiweǧǧiben, yessemlal-d arrac, tiqcicin , imɣaren akked ilmezyen di Teslent. : «nessaram, d ass ara yesdukklen cmel, wa ad qqiment leɛwayed i tsetwin i d-iteddun, acku d nutenti ara ad tent–ikemmlen», i d-yenna Ali Teslent yiwen uɛeggal n taddart.
Brahim Benhamouche