Yenna-as winna: « Zik d Rrus d Marikan, tura yerna-d Ccinwa »
Awal n umedyaz werǧin ad t-yeǧǧ lweqt, werǧin ad yesbek akken tsebbek zzit di lawan n tegrest. D tagi d tamdint n Berǧ Mnayel akken i as-neqqar tura, zik-nni ttɛawaden-d, d amkan n yimnayen, dinna i d-ttilint temsizzliyin, dinna i d-siriǧen iɛudiwen syinna i d-ttifriren irgazen iḥerbiyen neɣ imnayen ara yeddmen amrig i umager n yixsimen. Annect-a yeḍra di zzman n At Qasi yellan ddaw laɛnaya n Yiterkiyen… Tbeddel tallit; amkan-agi yeɛmer, yuɣal d tamdint am nettat am temdinin n tmurt, da izad, da ixuû. Ttjara teɛmer s yimawlan-is, teldi tiwwura-ines i uberrani tger irebbi i wiyaḍ.
Aberrani d icenwaten i yebdan la ttressin iman-nsen s leɛqel s leɛqel, akken qqaren « Seg usennan ɣer tmellalt ». Di tazwara kecmen-d d ixeddamen di tkebbunay, syenni d ttjara ar taggara ad myuqqanen maḍi d yessi-s n tmurt, ad gen tiwaculin. Gar-aɣ d kra n yideggasen ad nuɣal d abumexluḍ ur nferru anwa i d wa! Yettaɣ lḥal akka i tella deg umezruy n tmazɣa. Kra n win d-ikecmen tamurt-a ama d amharras ama d inebgi d nekkni i s-iggaren irebbi, nesterḥib s leɛwayed-is d nekkni i ittɛanaden tikli-ines, i ittezwaǧen d tiktiwin-in. D nekkni, d nekkni, d nekkni…
Yiwet yiwet, iḍelli-nni d-rsen di lzzayer tamanaɣt, nnan-as akk « Normal » d wagi i d udem n tmanaɣt di yal tamurt, s uḥrured ufan-d iman-nsen di Berǧ Mnayel; assa la ten-nettwali s cci-nsen d tḥuna-nsen d uzuzer n lekyasa di yal tazniqt, wwin di temdint! Azekka ad ten-naf-neɣ ɛad ur ttawhamet ara deg uẓru n Ṭṭhur neɣ deg ulxu ttnadin deg yiɣsan
Wi i yeẓran!
Ɛebdella Ɛerqub