Ass-nni n sed 05 deg unbir 2016, tella-d yiwet n temlilit i usileɣ n yiselmaden n yiɣerbazen ilemmasen n tɣiwant n Tizi Uzzu. Tannant-agi, teḍra deg uɣerbaz n Watmaten Oukal deg taddart n Azib Ahmed. Asentel n tannant, yeɛna tarrayt n uselmed s ttawil usenfar (La pédagogie de projet). Tella-d temlilit s lmendad n umaswaḍ n yiselmaden-agi, Mass Abdellah Arkoub akked sin-nniḍen n yimselɣen, Mass Bekhti Ali d Mass Hocine Moula. Ahil n wass, yebḍa d iḥricen. Yebda ɣef tesɛa n ssbeḥ, yekfa ɣef tlata n tmeddit. Deg wawal n tazwara, yemmeslay-d Mass ARKOUB ɣef usedwel n usenfar (la pédagogie de projet) akked iswi n temlilit. Ma d Mass BAKHTI, yesmekta-d amecwar n usileɣ-nsen deg useggas n 2007 netta d Mass MOULA anda i d-yenna d akken mačči d ayen isehlen akken ad truḥeḍ srid ɣer unnar. Yal wa, melmi i yezmer ad yessexdem tarrayt-a. Yesmekta-d, diɣ, d Mass MOULA i d amezwaru i iruḥen srid s annar s tebɣest. Ayagi i yeğğan Mass BEKHTI ad t-yeḍfer ula d netta akken ad yessileɣ iselmaden n tmaziɣt. Ɣef wakken i d-yesmekta, almi i iɛedda useggas segmi yebda Mass MOULA i yebda netta. Syin, walan yimunan sin n yisenfaren i xedmen yinelmaden n Mass Moula deg uɣerbaz n Tala Athmane, yiwen xedmen-t-id ɣef waman ; amek i d-ttawin aṭṭanen. Ufan-d belli d yir aman i yettruḥun srid ɣer wasif u yis-s i tessen yifellaḥen tibḥirin–nsen, mi ččan izegza d yigumma–nni yimdanen, ad helken. Segmi walan yimezdaɣ tugniwin–nni, rran aḍar wid-nni yessamasen. Ma d asenfar wis sin, wwin-t-id ɣef tmeṭṭut taqbaylit d lḥif i tesɛedda. Ruḥen yinelmaden–agi ɣer yiwet n tmeṭṭut iwumi qqaren OUARDIA. Terra-d ɣef yisestanen–nsen, tefka-asen-d isallen ɣef ccɣel i xeddment, ama deg uxxam ama di lexla : ad sewwent ; ad sirdent ; ad neqcent : ad leqḍent azemmur ; ad zḍent nneɛma s tessirt n leqbayel ; ad rebbint, ɣas akken ‘’ɣer urgaz-is d tiyita, ɣer temɣart d tiẓẓift, ɣer tmetti d tamḥeqranit’’. Taggara, tesbuɣer-asen-d. Ɣas akken d inelmaden n uɣerbaz alemmas n uswir amezwaru d wis sin neɣ wis kraḍ d ukkuẓ, maca sawḍen ad d-xedmen isenfaren-agi s tugniwin, s tira, s usteqsi. Mi yekfa usenɛet n sin n yisenfaren-agi, sgunfan iselmaden ciṭ, ččan imekli lwaḥid , ddukklen am wakken ara teddukkel tasa d way turew. Uɣalen ad kemmlen askasi ɣef yisenfaren n yiselmaden, dɣa, yefka-asen Mass ARKOUB tagnit ad ferqen d igrawen am yinelmaden. Yal tarbaɛt temsefham ɣef usumer n tikta. Taggara, yal agraw yefren asenfar ara yexdem. Llan wid yextaren, ammud n tmucuha (tugnisin), llan wid yextaren lehyuf, asewwi akked useḥbiber ɣef uɣerbaz. Ɣer taggara, ṭṭfen-d tugna akken ad teqqim deg ccfawat. Iselmaden, ferḥen imi amaṣwaḍ-nsen, yefka-asen lxetyar, yerna yettkel fell-asen, yal tikkelt yisebɣas-iten. Ttiɛad-nniḍen n usileɣ, ad d-yili ass n arim 7 deg unbir 2016 deg uɣerbaz n Azib Ahmed 2. S wanect-a i ttilin yinelmaden n Tizi Uzzu d imezwura yal aseggas, imi ula d iselmaden-nsen, ttilin deffir rbeḥ-nsen, abaɛda iselmaden n tmaziɣt. ‘’Ɣef wakken i aɣ-d-iban usenfar deg uselmed, d akken d ttawil i uselmed mačči d iswi kan. S ttawil usenfar, anelmad ad yeɛreḍ ad inadi ɣef tmussniwin ara yessqdec i wakken ad ireṣṣi yis-sent tizemmar-is. Yettnadi ad yerr timussniwin d tizemmar, amčči am wakken uɣen tannumi yinelmaden d leḥfaḍa i ḥefḍen timussniwin mebla asexdem-nsent, syin ad tent-rren deg ukayaḍ akken kan, am wakken d lamana i asen-yefka uselmad-nsen, rran-tt-id akken tella.’’, i aɣ-d-yenna yiwen uselmad i iḥedren i temlilit. Ad d-nesmekti belli d tarrayt-agi i textar tneɣlaft n usegmi i uselmed deg tmurt. Afud igerrzen i yiselmaden akked wid i d-yellan deg lmendad-nsen.
Zakia Ben Yahia