Ilmend n ddurt n usmekti n wass amenzu n unbir n tegrawla n 1954 , imezdaɣ n taddart n Ulma Wagnan di tɣiwant n Yiɣram, ldin s wudem unsib timeqbert tamaynut i 40 n yimeɣrasen i d–tefka taddart n tegrawla n 1954. I lmend n waya, heggan-d yiwen n leqdic d amerkanti . Di tazwara, yella-d s usrusuy n tmuqint n yijeǧǧigen d dqida n tsussmi i usterḥem ɣef yimeɣrasen n tegrawla n 1954. Ɣer lehwi n 10h00, telli n yiwet n tzeqqa yettuheggan i timsikent ideg i d-seknen tṣawer n yimjuhad d yimeɣrasen n taddart d wiyaḍ-nniḍen akked kra n yidlisen d yimagraden yettwarun ɣef umezruy n tegrawla n lezzayer. Syin akin, yettunefk wawal i yimjuhad akked tulawin n yimeɣrasen; yal wa yefka-d taganit-is d cfawat ɣef umennuɣ n kra n umeɣras yessen di lawan-nni n tegrawla, am wakken i d-mmeslayen kra n yemjuhad i d-yussan di temnaḍin-nniḍen n tmurt ɣef umennuɣ i d-yeḍran deg udewwar n Yiɣram ddaw taddart n Yiɛemmuren deg unebdu 1958, ɣef i d-yemmeslay umjahed amyaru n umezruy Djoudi Attoumi deg udlis-ines ɣef umezruy n n lwilaya III. Yekfa leqdic i d-heggan Wat Ulma Wagnan s ufraq n kra n warrazen i twaculin n yimjuhad d yimeɣrasen d wid i d-yefkan afus n lemɛawna. Ad d-nebdar gar-asen imdebbar n luzin yaourt Soummam Lounis Hamitouch di lebni n tmeqbert-agi, am waken i ireggem s lebni n usalay ideg ara d-ttwajemɛen yimagraden , d iselsa akked d dduzan seqdacen yimjuhad di lawan-nni n tegrawla.”s yiwen n usalay am wa, asmi ara ifak, ad d-qimen cfawat n umezruy n tmurt-nneɣ d wansayen n lejdud—nneɣ i tsutwin i d-yettnekkaren akken ad zren ansi i d-kkan , I wakken ad asen-iban wanida teddun ‘’, i d-yenna Mass Sofiane Benkerrou d aɛeggal n lɛuqqal n taddart.
Brahim Benhamouche