Mebɛed mi temyaɛaddal tarbaɛt n JSK akked terbaɛt DRBT, yiwen ɣer yiwen deg unnar n Tizi Uzzu, mačči d yiwen neɣ d sin n yimferǧen n JSK i yessteqsayen ɣef ssebat i yeǧǧan tarbaɛt am ta tettaṭṭaf yir amekkan, yal aseggas, deg telɣuɣa tazzayrit n ddabex uḍar.
Ma nwala, aseggas-agi kan, 6 n temliliyin i turar deg unnar n umenzu n unbir n Tizi Uzzu mebla ma terbeḥ ula d yiwet. Aṭas n yimḍebbren i yessaḍlamen anefray ass-nni n temlilit, acu kan mačči d yiwet n tikkelt neɣ d snat i wakken ad nner akk ṭṭlima ɣef unefray xas ulamma ula d netta itecceḍ sya ɣer da. Seg tama n yimyuraren, ad naf d akken nutni sseḍlamen asleɣmay. Yal tikkelt llan wid i d-yettnekkaren mgal-is. Tikkwal ssawaḍen taswiɛt alamma terkem. Syin, yettban ubrid-is. ‘’Ṭṭlima yellan ɣef uccen, rran-tt-id ɣef uyaziḍ. Skud ara ssḍelmen iman-nsen nutni, imyuraren la sseḍlamen wiyaḍ’’ i d-yenna yiwen umferreǧ n tarbaɛt n JSK. Ula seg tama n yimyuraren iqdimen n tarbaɛt n JSK, amur ameqqran deg-sen, ssḍelmen imleɛben n tarbaɛt-a. deg yiwen wulɣu i d-yura yiwen deg-sen deg Internet, yenna-d :’’ imyuraren-agi n tura, ur leɛben ara s nnif, ur tturaren ara seg wul-nsen. Mačči am nekni asmi nella deg tarbaɛt n JSK. Nḥemmel tarbaɛt-a, ur netturar ara ɣef yidrimen am wakka tella tura. D tamsalt n nnif, JSK d azamul n Leqbayel’’. Llan kra yerfan nezzeh, ssawḍen armi i d-nnan ur ilaq ara ad ruḥen yimferǧen ɣer unnar mi ara telɛeb JSK, i wakken ad walin azal tesɛa tarbaɛt-a. Lḥasun, amur ameqqran n yimferǧen, sseḍlamen imyuraren ugar n uselway Hannachi, xas ulamma aṭas deg-sen i yebɣan rrwaḥ n yimḍebber-agi amezwaru. Aya, yettban-d deg wwassaɣen n ddir i yellan gar yimferǧen d Hannachi. Seg tama-s, aselway n JSK, yenna-d imferǧen ittergimen deg unnar, ur ten-neḥwaǧ ara. Ilaq-asen ad ttɣimin deg uxxam. Ɣef wakken i d-qqaren, ɣef rregmat-agi, dɣa, i yebɣa ad iruḥ umyurar Rial seg tarbaɛt n JSK imi kksen fell-as sser seg temlilit-agi taneggarut. Amyurar-a, yettuneḥsab ɣer usneɣmay i iruḥen, Mouassa, d aɣbalu n wuguren, d netta i d ssebbat n rwaḥ n yimyuraren yeṭṭaxren seg terbaɛt n JSK. Xas ulamma d amyurar iwulmen i terbaɛt n JSK, meɛna imḍebbren n terbaɛt-a, ɣef wakken i d-yeffeɣ lexbar, ur tettaṭṭafen ara ma yebɣa ad iruḥ. Ha-t-an Hannachi la d-yettnadi wayeḍ. Seg tama n usleɣmay, Hiddoussi, taswiɛt ur teẓmik ara dɣa mliḥ imi yelha wamek turar JSK, tuklal 3 tenqiḍin. S wawalen-a i yeɛreḍ ad isebber aselway Hannachi i izeɛfen nezzeh taggara n temlilit-nni gar JSK akked DRBT. Acu kan, iṛeggem ad d-yaf tifrat i twaɣit-agi i deg i tella tarbaɛt-is.
Hocine Moula