Yettwafren-d Mass Amara Benyounes i wakken ad yili d aselway n ukabar Amussu Aɣerfan Azzayri MPA ass-nni n sebt 3 deg duǧember 2016 deg temlilit n ugraw n MPA i d-yeḍran ussan n 1u, 2 d 3 deg waggur deg-i i nella.
Tella-d temlilit deg Zeralda sdat n 1400 n yimeɣnasen n 48 n lwilayat n ukabar MPA akked yinebgawen, ama d wid n yikabaren am FLN neɣ RND, ama d imḍebbren-nniḍen. Deg ugraw-a i yellan s ddaw n tenfalit ‘’Tugdut di talwit’’, yesmekta-d Mass Amara Benyounes ahil n ukabar-is s telqayt. Yenna-d dakken d lettkal ɣef lgaz akked tiktiwin n kra yimḍebbren i yessawḍen liḥala ɣer wanda tella akka tura tmurt. D iwillehen n yimḍebbren-agi i yellan d ssebba, d nutni i yessrewlen imdanen i yebɣan ad sseftin deg tmurt. Ɣef wanect-a, dɣa, i d-yeḍleb abeddel s telqayt seg yal aḥric ama d win n tdamsa, tadawsa, tafellaḥt, idles, leqraya…atg. Am wakken i d-yebder, diɣ, tamsalt n tmaziɣt anda i d-yenna belli laqen-as ttawilat i wakken ad teṭṭef amekkan i as-iwulmen deg tmurt-is. D taswiɛt, daɣen, i yimḍebber amezwaru n MPA i wakken ad yefk iwellihen ɣef wahil ara yesseqdec ukabar sya d afella, ladɣa deg tefranin i d-iteddun imi, ɣef wakken i d-yenna Mass Benyounes, yebɣa ad yeqqim ukabar-is deg umḍiq wis tlata i yeṭṭef akka tura. I usmekti, akabar n MPA, ɣur-s 91 n yiselwayen n tɣiwanin, gar-asent taɣiwant n Lezzayer talemmast. Yesɛa 7 n yimukan, diɣ, deg Useqqamu Aɣerfan Aɣelnaw APN. Yessaram yimḍebber amezwaru n MPA, ad yali uswir deg unnar-agi n tsertit lawan n tefranin i d-iteddun u ad nnaɣen yimdanen s tektiwin mačči s rregmat, ɣef wakken iwala Mass Benyounes.
Hocine Moula