Xas ulamma teǧǧa-aɣ tfekka-s, acu kan mazal ṣṣut-is gar-aneɣ. Yeqqar umussnaw-nneɣ, Dda Lmulud :’’yella walebɛaḍ, yella ulac-it. Yella walebɛaḍ, ulac yella. Ihi’’, acennay-nneɣ ameqqran Lounes Kheloui, ha-t-an ass-a yid-neɣ s tezlatin-is i yessekles uqbel tamettant-is. Isellek asekles-nsent deg 20 deg tuber iɛeddan, kra n wussan kan uqbel ad yemmet. Deg yiwet n tdiwennit i uɣmis La dépêche de Kabylie, asmi yella deg sbiter, yenna-d : ‘’ssaramaɣ ad cnuɣ i tikkelt taneggarut deg uxxam n yidles Mulud Mɛrmmri n temdint n Tizi Uzzu asmi ara d-ffɣent tezlatin-iw timaynutin’’. Ha-t-an yeffeɣ uzgen kan n usirem n unaẓur : ffɣent-d tezlatin-is xas ulamma netta ulac-it, ma ɣef uxxam n yidles Mulud Mɛemmri, ruḥen yimdanen i wakken ad t-walin i tikkelt taneggarut asmi yemmut, mačči i wakken ad as-slen am wakken yessaram. Deg tezlatin-is tineggura-a, ad as-tiniḍ icar-itt. Yefka azwel i Album1, Lefraq am wakken iḥus yis-s iḥḍer-d. Ula deg tezlit taneggarut ibeqqa slam i ddunit, yenna :’’qqim di lehna a ddunit, ass-a, akked-m ay ddiɣ. Qqim di lehna a ddunit, aggur, iṭij ttwaliɣ. Qqim di lehna a ddunit, ma d kunwi ar timlilit’’. Mi ara icennu tizlatin-agi-ines tineggura, ad tḥasseḍ tella lḥaǧa : iger-d akk iḥulfan-is. Ula d ṣṣut-is ibeddel ciṭ. Xas yenqes nnefs-is imi aṭṭan-is d idmaren, acu kan yettban-d yeḥzen mačči d izli. Ittaɛraḍ ad t-yeffer, meɛna tettensar-as-d tuffra-agi seg kra n tuɣac. I wakken ad yexdem umdan ayen akka yexdem Kheloui Lounes, ad d-yecnu tizlatin ɣef lmut i t-yettraǧun deg kra n wussan kan, yerna yeẓra, ilaq ad tiliḍ dɣa d Kheloui, d kečč ay d kečč ! ilaq ad tesɛuḍ tabɣest yenneflen, tirrugza n yigelliden-nneɣ imezwura. Xas ulamma ẓran akk yimdanen ad mmten, acu kan mi ara d-taweḍ, tewɛer i wakken ad tt-tqableḍ. Yenna umedyaz deg wawal-is :’’ɣef temgerḍt ma yers lmus, i tidet ma ad d-teffeɣ imi’’. Tajmilt i nezmer ad as-ner i ucennay Kheloui Lounes, ad nsel i wayen i d-yecna i tikklet taneggarut. Tizlatin ha-tent-in. Album1 : Lefraq, Teswira, Bɣiɣ, Aggur, Xelfeɣ-d, Tuffɣa, Qqim. Ma d Album2 : Lwehma, Ɛyiɣ, Tejra, Lawliya, Wali, Sseɛd-iw, A Ccix.
Gen deg talwit a Lounes, xas ‘’teǧǧiḍ-aɣ, teǧǧiḍ-aɣ-d’’.
H. M.