Yeḍra-d ddurt iɛeddan unmuggar amezwaru n tgemmi tadelsant tamensayt deg Uxxam n yidles Mulud Mɛemmri n temdint n Tizi Uzzu.
Yettuhegga-d leqdic-a sɣur Tanmehla n yidles n Tizi Uzzu ɣef teɣzi n rebɛa n wussa : seg 6 ar 9 deg duǧember 2016. Anmuggar yella-d d tajmilt i Mass Youcef Nacib, amnadi deg tsekla taqabaylit neɣ n tmaziɣt s umata. Wid i d-iheggan timlilit-a, ffkan-as asentel ‘’Tigemmi tadelsant gar aylayni d uzzewzel’’ ɣef wayeg i d-gan yimussnawen d yimyura ddeqs n yisaragen. Nezmer ad d-nebder, wid-nni n yiselmaden n tesdawit Mass Cheimakh Said akked Djellaoui Mohamed i d-yemmeslayen ɣef wamek i d-yella useḥbiber ɣef tgemmi seg tira n Youcef Nacib. Syin yella-d usarag-nniḍen sɣur Mass Lasheb Ramdane akked Mass Bentaleb Brahim ɣef tgemmi tadelsant tamensayt. Zyad ɣef wanect-a, llant aṭas n temsekniyin deg uxxam n yidles Mulud Mɛemmri, ama d tid n llebsa, tagella, afexxar, idlisen…Am wakken i d-yella, diɣ, usenɛen n leqdicat yettilin zik deg uxxam n leqbayel, am ussewi n seksu, tameɣra n tlalit n ugrud, ahuzzu-ines deg dduḥ, rwaḥ ɣer lexla d uẓeṭṭa. Yella-d leqdic-a sɣur Tiddukkla Tadelsant Yessi-s Idurar. Aṭas n wayen-nniḍen i d-yeḍran deg ussan-agi n unmuggar. Wid i d-yusan slan i tmucuha, isefra akked lemtul i d-tenna Djamila Bouanem. Yella ula d nwal n iwejjiben akked tmeɣra n Unẓar i d-heggant tlawin n Tiddukkla tadelsant Yessi-s Idurar. Ma d Tiddukla Tadelsant Iselqam n Talext, nettat tessnaɛt-d amek i d-tettili tuqda n ufexxar. Deg taggara, yella-d usenɛet n yiwen n usaru ɣef unamek n yizamulen n rrqem deg talaxt, timenna n kra n tdemyazt taqdimt, timseɛraq akked ccna n ddin sɣur lexwan n Draa Ben Khedda.
Nnant-d :
Massa Kemmar, d tanemhalt n uxxam n yidles Mulud At Mεemmer : “Ad snimmreɣ aṭas tiddukliwin tidelsanin i d-yerran i teɣri-nneɣ, gar-asent: Yessi-s n Yidurar, Iselqam n talaɣt…atg. Ayen yesefrahen imi nwala gar wallen-nneɣ mazal wid yeṭṭfen deg leεwayed d tẓuri-nneɣ taqburt, ama d talaɣt, ama d aẓeṭṭa, ama d tagula n zik… Nessaram ahat yiwen wass ad siwḍen yimɣaren d temɣarin, ad asen-slemden i yilmeẓyen d tlemeẓyin insayen d tẓuriwin n zik. D tagnit daɣen anida i d-nessemlal aṭas n yinaẓuren i d-isiknen axeddim-nsen i yimezdaɣ n Tizi Uzzu. Nezmer ad d-nini, belli newweḍ ɣer yiswi-nneɣ i nejred i leqdic-agi, imi ama d imezdaɣ n lwilaya n Tizi Uzzu iεejbab-asen lḥal aṭas, ula d inaẓuren d tiddukliwin tidelsanin ferḥent daɣen, ihi d wagi i d iswi-nneɣ nekni.”
Massa Goumeziane Nabila, d tanemhalt n yidles n lwilaya n Tizi Uzzu : “nessuddes-d ussan-agi timlilit tamezwarut n tgemmi tadelsant tamensayt, i nga d tajmilt i umnadi d umaru-nneɣ ameqqran Youcef Nacib, ɣef teɣzi n rebɛa n wussan. Nebɣa ad nseḥbiber ɣef wayen nesεa, ama d ansayen, ama d idles, ama d tigemmi-nneɣ s umata. I wakken daɣen ad d-nesken i medden ayen nekseb n ugerruj deg tɣerma-nneɣ taqbaylit, wa ad t-nesken, ayɣer ala, i leğnas merra n umaḍal”.
Hocine Moula