Am yal taddart neɣ tamenaḍt seg temnaḍin n Leqbayel, yal ta amek tesfugul ansayen-is (Taεacurt, Lmulud, Yennayen…). ussan-agi nerza ɣer tadddart n Ait Illoul deg tɣiwant n Azeffoun, i wakken ad nẓer amek xeddmen timecreḍt. Deg taddart-agi n Ait Illoul, yal aseggas txeddem lewziεa deg ass n Lmulud. Tebda ass-nni n lğemεa 09/12/2016 tameddit n wass, menbeεd taẓalit n Ṭhur. D tasqamut n taddart d yimezdaɣ-is i tt-id-suddsen, anida seččen akk taddart s uksum. Uɣen-d tlata n yizegaren, zlan-ten ass-nni n sem, ma d azekka-yin ṣṣbaḥ 10/11/2016 ferqen aksum-nni ɣef wazal n 210 n tesɣar. Ma d imeɣban neɣ wid ur nezmir ad xelṣen sehma-nsen, ttawin-tt baṭel. Yal tasɣart tesεu gar 6 ar 7 kg, s wazal n 4500 DA . Am wakken neẓra belli lewziεa tesεa azal d ameqqran deg tmetti taqbaylit, ama zik ama tura. D tagnit ideg ttemlilin medden, imi yezmer lḥal aseggas ur ttemyagaren ara, imi yal yiwen yelha kan deg ccɣel-is, am wakken qqaren zik:“ temmlal tasa d way turew”. D tagnit daɣen, ideg ttemεawanen yimdanen way gar-asen, imi yal yiwen ad yexdem ayen iwumi yezmer. D ass ur necbi wiyaḍ, imi taddart si rrif armi d rrif ad tečč akk yiwen n yimensi s uksum, am ugellil am unesbaɣur, yiwet n lmakla ara ččen. D tagnit anida tettnerni tegmat, anida daɣen ttiğhidden wassaɣen gar yimezdaɣ n yal taddart. Ad nesmekti kan belli, timecreḍt-agi yal aseggas xeddmen-tt deg ass n Lmulud, maca tikkelt-agi gan-tt uqbel s sin wussan.
Amazigh Ghani