Seg tazwara n useggas-agi n 2016 ideg nella ar ass-a, azal n 15 n yisenfaren i yettwaxdamen sɣur usqamu aɣerfan aɣiwan (APC) n Ait Aissa Mimoun, iɣef i yella ɣef uqerruy-is Mass Akli Chabane.
Isenfaren-agi, ttwajerden deg lejrida n lxedma i useggas-agi n 2016. Gar 15 n yisenfaren-a, llan 5 seg-sen εnan aftaḥ n yiberdan n tfelaḥt daxel n tudrin. Amedya: aftaḥ n sin n yiberdan, yiwen deg taddart n Imkechrene, wayeḍ deg Tizi Tkharoubt ɣef teɣzi n sin ilikilumitren d uzgen. Sin-nniḍen seg-sen, d tiregwa i waman ɣef yiri n yiberdan n tuddar, Mendjah, Imkechrene, El Hara Oufella (Ikhelouiène), Akar Dhamoune, Vouchouva, d tregwa-nniḍen deg Ighil Bouchene akked Akaoudj. Am wakken, daɣen, i rran ssiman i tlata n yiberdan yecban win n Akarou Thanouts, Tharga deg taddart Akaoudj akked El Klaa. Yella-d, diɣ, usewseε n sin yiberdan imeqranen; amezwaru d win yeqqnen gar Dhlalouth alamma d Ighil Bouchene, ma d wis sin d win yeqqnen gar Boussouar d Igounane Ameur. Seggmen, daɣen, sin n yinurar n waddal n snat n tuddar: yiwen deg taddart n Igounane Ameur yesɛan tajuma n 3300 M2, ma d wis sin deg taddart n Ighil Bouchene n 4000 M2. Aṭas-nniḍen n yeqdic i yettwaxedmen, am lebni n lḥiḍ n ublaḍ deg unnar n Akaoudj d lxedma n teftilin n yiberdan deg Izourar n Tala Gahia. Isenfar-agi akk yettwaxedmen seg tazwara n waggur n yennayer, sqamen-d i tɣiwant s lqidar n 10 000 000 DA. Mazal akemmel n lgaz n temdint. Mazal imezdaɣ n 23 n tuddar n tɣiwant-agi n Ait Aissa Mimoun, ssuturen akemmel n usenfar n lgaz n temdint, imi mazal ar ass-a n wussan aɣbel-agi n lgaz ur yefri ara. Imi mazal aṭas n tudrin i t-yeddren, acku seg ttnaṣfa n useggas 2015 i bdan lxedma deg-s, maca mazal ar ass-a urԑad yekcim ixxamen n medden, anida Leqrar-is ? . Membeεd mi tikebbaniyin-nni yeṭṭfen asenfar-agi, yella winda bdant axeddim ğğant akken, deg waṭas n tuddar yecban : Tahanouts, Ighil Bouchene, Ait Khelfats…atg. Maca llant tuddar anida mazal ur bdin ara maḍi imuhal-is, yecban tudrin-agi: Ifouzar, Imkechrene, Menaam…atg. Akka tura, ala yiwet n tkebbanit, i d-yeqqim tettkemmil axeddim-is, deg tama n Ikhelouiene, d Mendjah, Igounane Ameur. Maca yiwet-agi i d-yeqqimen, ur tezmir ara ad teṭṭef asenfar-agi n lgaz deg 23 n tuddar n tɣiwant-agi. iIlaq ad d-awin tikebbaniyin-nniḍen. Ma ulac ur ikeccem ara lgaz s ixxamen n yimezdaɣ n tɣiwant n Ait Aissa Mimoun ahat alamma 2020 ma yella kra. Imezdaɣ n tuddar –agi, ṛwan lḥif, ladɣa deg tesmhuyt n tegrest, neɣ deg ussan n ccetwa, imi acḥal n tikkal i leḥḥun d likumiṭer i wakken ad d-awin taqqerԑat n lgaz, ama d aggefur neɣ d adfel. Tikwal ttuɣalen-d ifassen d ilmawen. D ayen i ten-yeğğan ad d-gren tiɣri yerna ad ssutren deg wid teԑna temsalt, gar-asen imeḍberen n tɣiwant Ait Aissa Mimoun, iɣef yella ɣef uqerruy-is Mass Akli Chabane, d tenmehla n Imuhal Izuyaz n lwilaya n Tizi Uzzu.
Adaoun Abdelghani