Tidukkla Tadelsant Itran n Tqerbust mazal-itt d turmidt deg leqdicat-is idelsanen. Segmi i d-tennulfa deg useggas n 2003 ar ass-a, tettkemmil ayen i d-tebda s yiwen n umenzay n tayri i yidles amaziɣ s umata. Ladɣa i umezgun. Tikkelt-a, ihi, d ameslay ɣef ttiɛad-is i as-d-yellan i tikkelt tamenzut, ass n sem yezrin deg Tizi Uzzu, neɣ deg Uxxam n Yidles Mulud At Mɛemmer. Dinna temlal Tdukkla-a Itran akked yimarayen n win iwumi qqaren ababat n tẓuriwin. Tidukkla Itran, neɣ wid iqeddcen deg-s, wwin-d ass n sem iɛeddan taceqquft n umezgun i tura Massa Nasira At Yusef. Tameskart-a, tefren ad as-tefk azwel “Taɣdemt taquḍart”, imi deg-s terra tajmilt i yimyura d yimegzuyen am Muḥya d wiyaḍ. S tallelt ihi n tmehla n Yidles n Tizi Uzzu, Axxam n yidles Mulud At Mɛemmer, akked Uxxam n umezgun Kateb Yasin, ɛeddan yilemẓiyen i d-yuraren taceqquft-nni ɣef usayes, jebden awellih n kra win d tin iḥeḍren ttiɛad-nni. «Ɣas s lexsas n ttawilat nessaweḍ ad d-nelḥu amecwar, ad nexdem s wayen umi nezmer. Nessaram ad naf afus n lemɛawna sɣur wid i teɛna temsalt, akken ad nsemmed leqdic-nneɣ ɣef yidles amaziɣ war iɛewwiqen i d-nettmagar, abeɛda wid n tedrimt». I aɣ-d-yenna Mass Naser Terrad, aselway n Tdukkla Tadelsant Itran n Tqerbust. Ad d-nesmekti kan dakken Tidukkla-a, mazal tesɛa ttiɛad-nniḍen ass n 11 deg wayyur-a, deg twilayt n Tbatnet, anda ara tili akked qeddac n tdukkliwin tidelsanin i ittekkan deg umsiẓwer-a n umezgum amaziɣ. Akka ihi, am yal tikkelt Tidukkla Itran ur as-ttruḥent tegnatin am ti, ideg tamsalt tcudd ɣer umezgun d yidles amaziɣ s umata. Ur tebɣi ad teqqim d tin iqeddcen deg Tubiret, maca tessaram ad teldi tiwwura i yiberdan-nniḍen akken ad tefk ugar n wayen i d-tefka yakan, i d-tettak daɣen.
Kaisa Khalifi