Ass-nni n sebt, 17 deg duǧember 2016 , di temlilit n uselmed d useɛlem ɣef lehlakat n tlawin I d- thegga tiddukkla n yimuḍan d wid yenḥafen “Soummam Akbou “di tzeqqa Haddad n temdint n Uqbu, tuɣal-as tejmilt i umejjay Rekis Ahcene “ amejjay n yimeɣban “am wakken i yessawalen yimezdaɣ n la summam. Rekkis Ahcene d amejjay n 80 n yiseggasen , yebda lxudma deg sbiṭar seld timunent n tmurt Lezzayer. Yexdem deg uqbu nnig 25 n yiseggasen, yebda deg yiseggsen-nni n 70. Yella d imdebbar n tezmert di sbitar-nni. Werǧinin yessin d acu i d-ɛeggu neɣ i yestehza deg yimuḍan. Ttqadaren-t akk yifremliyen d yixeddamen n sbiṭar. Di taggara n yiseggasen n 80 asmi bdan ttefɣen-d yimejjayen imaynuten, yuɣal ixeddem i yi-iman-is. Yeldi tazeqqa n udawi , ttruḥun medden ttdawin ɣur-s am win yesɛan am win ur nesɛi. Tuget ur ttxellisen ara maḍi , tikwal , ad as-d-yefk i umuḍin tafaturt n ddwawi, wa ad as-d-yernu asurdi i wakken ad tent-id-yaɣ. “ Mass Rekis Ahcene, yettdawi s wul-is, yumen s wazal tesɛa tezmert n umdan, mačči d amestajer. Yuklal aṭas n leqdar, ad yesseɣzef Rebbi di leɛmer-is. Nettmenni-as tazmert n tzemmurt ”, i d-yenna uselway n tiddukkla Soummam Akbou Mass Djernin Hamid S wakka ad d-yeqqim umejjay-agi d amedya i yimejjayen n tsuta n wass-a, d amedya di ttrebga akked lxir yesɛa. Win yebɣan tajmilt yezwer lxir, tijmilin ur tent-id-ttaɣen ara yedrimen.
Brahim Benhamouche