Yal amedyaz yettban yettawi aṭas n tlufa deg uqerruy-is, ur ḥala asefru. Yal amedyaz yesɛa aṭas n wawal i yebɣa ad t-id-yini ad as-slen wiyaḍ, imi deg-s izen. Deg tdiwennit-a, yemmeslay-d mmi-s n Yiwaḍiyen, mass Belqasem Sikadir ɣef kra n temsal.
Aɣmis n Yimaziɣen: anda tettwaliḍ ugar ccbaḥa n usefru?
Belkacem Sikadir: ccbaḥa n usefru tezwar-d seg usentel akked talɣa d amek i d-yebna usefru. Nekk ḥemmleɣ asefru anida tella daxel-is tuffirt anamek: ad d-yili yiwen n usefru, ad t-ɣren εecra n yimdanen. Mbeɛd yal yiwen seg-sen ad t-yegzu s tidmi-s, ad mgaraden yiḥulfan ɣer usefru-nni.
Nerra tamawt i yisental i tettaruḍ, nufa aṭas seg-sen ɣef tayri d laxert. Acimi?
D tidet, tuget n yisefra-w ddan s tayri. Maca ilaq ad nerr tayri di yal iḥulfan i icudden ɣer umdan, tayri ɣer tmeṭṭut, ɣer yimawlan, ɣer tmurt, ɣer tutlayt… Acku leḥmala ur telli kan gar urgaz d tmeṭṭut. Ddeqs n yisentel i ttaruɣ daɣen ɣef At laxert. Annect-a, d tidmi i d-ineflen ɣer wallaɣ n umedyaz; ayen i d-yusan ad yaru fell-as
Yal ass ttlalen-d yilemẓiyen d imaynuten, ttekcamen-d deg unnar n tmedyazt. D acu d awal-ik ɣef waya?
Aẓar yettabaε tara. Taqbaylit tebna s wawal mačči s tfukal. Nekk ad d-iniɣ d amennuɣ, d aseḥbiber ɣef tutlayt akken teṭṭef amḍiq-is deg unnar n tmussni. Si tama tayeḍ, ilemẓiyen i d-yettilin d imaynuten, ahat mačči weḥd-sen i d-rzan ɣer tmedyazt, maca d taqbaylit i asen d-yessawlen. Ayen yessefraḥen aṭas imi ula d tiḥdayin gezment lqid i yiles. Acku ma nger tamawt, yella umgarad gar yiseggasen n 70, 80, akked 90, ulac aṭas n teḥdayin (tilawin s umata) i yellan deg unnar n tẓuri neɣ n yidles. Wamma tura, ddant akken yedda urgaz. Aya d ayen i teḥwaǧ tmetti taqbaylit, imi tutlayt tcudd ɣer tmeṭṭut ugar n urgaz. Ladɣa deg uḥric n ttrebga, imi d tameṭṭut i iqerben nezzeh ɣer tarwa-s. Meḥsub akken yebɣu yili lḥal, tutlayt n tyemmat ur tt-nettaf ara di lakul kan, maca deg tmussni n tyemmat i tella. Ilaq aqbayli ad yesseddu taqbaylit ama s wudem n tira neɣ s timawit
Ahat tettheggiḍ-d kra n umaynut swayes ara tesferḥeḍ wid i k-iḥemmlen?
Lecɣal ṭṭuqten, Lɛerbi yiwen (yeḍsa). Di tazwara d tadrimt i d llsas n yal leqdic. Aql-i ttheggiɣ ammud n yisefra, ssarameɣ ad yili akken bɣan wid i ara t-yeɣren, mačči kan akken bɣiɣ nekk. Ad farseɣ tagnit ad snemmreɣ nezzeh iεeggalen n tdukkliwin tidelsanin mi qeddcent di tfaskiwin. D nutenti ideg i d-yettaf ladɣa umedyaz anida ad d-yini awal-is. Nettaf timlilit din daɣen.
Tanemmirt a mass Belkacem. Rnu-aɣ-d awal n taggara…
Tanemmirt i kem a Kaisa. Afud igerrzen i Uɣmis n Yimaziɣen d wid akk iqeddcen i teqbaylit akken ad tidir.
Testeqsa-t Kaïsa Khalifi