Qrib i d-yeḍra deg tmurt, taggara-a, ubaxix ɣer medden, ɣas teḍra-d ccuha deg wayen yerzan amaḍal n tesnujjya d ddwawi. D yiwen n usafar « Rahmat Rebi », neɣ s yisem-nniḍen n « RHB », i d-yeffɣen ɣer ssuq akken zun ad yessenqes asɛeddi d tiqraḥ i yimuḍan n ssker. Maca, deg kra n wussan kan, iban-d belli win yellan deffir usnulfu n ddwa-a, mass Toufik Zaibet, yeɣleḍ aṭas deg leḥsab-is. Dɣa ddurt-a i iɛeddan i yessawel uɣlif n tnezzut ɣer tukksa n usafar-a seg leswaq. Ma d ulɣu deg yettwagdel s wudem unsib, yeffeɣ-d ttlata yezrin. Ula d Tamehla tamatut n tensafart d dduzan n tezmert, tger tiɣri dindin i wid yesnuzuyen ddwawi akken ur t-ttakken i medden. Di leɛḍil ideg ula d axdam-ines deg luzin yeḥbes yakan.Ilaq ad d-nessefhem dakken deg taluft-a, llum ameqqran yeɣli-d ɣef mass Tufiq i d-nebder yakan, imi rray azayez iberreḥ-d s lexsas n tzemmar ɣur-s akken ad yessiweḍ ad d-yeg asafar am wa. Ussan imenza yuɣ lḥal, ur ǧǧin wid ihelken aṭṭan n ssker amkan deg uḥebber ɣef usafar-a amaynut. Nwan zun ad ten-yenfeɛ ma uɣen-t. Netta, simmal yettḍurru-ten yessewɛar deg lḥala-nsen, ɣef leḥsab n wayen i d-tewwi tɣamsa. Mazal ad yili wawal ɣef taluft-a imi tazmert n umdan d tamezwarut.
Mhenni Khalifi