Ligzima, gar waṭṭanen n uglim yeṭṭuqten ama s argaz, ama ɣer tmeṭṭut, labeɛda di tmurt-nneɣ. Acu kan yettemxallaf seg umdan ɣer wayeḍ imi yesɛa sin n leṣnaf i ɣef ara d-nemmeslay s telqayt deg umagrad n dduṛt-a, d waṭas n tmussniwin icudden ɣer lehlak-a.
D acu-t ligzima ?
D aṭṭan n uglim yeṭtugten, yesɛan akmaz ameqqṛan. Yettbeddil ṣṣifa ɣef teɣzi n unerni-s. Di tazwara, yettban-d uglim d azeggaɣ, syin ad d-banent tcellibaḍ yeččuṛen d aman. Aṭerḍeq n tcellibaḍ-nni ama s ukmaz-nsent imi ɣeẓẓent aṭas, ama mebɣir akmaz, igellu-d s tfidi n uglim ara yeḥlun di kra n wussan war ma teǧǧa-d ccama.
D acu n leṣnaf yesɛa waṭṭan-a?
Tussna tessiweḍ ad d-tbeggen dakken yella ligzima n usami n kra n tɣawsa , yettḥaz s umata win meqqṛen, am win ibennun, tin yessexdamen kra n ddwawi i ssbiɣa n ucebbub labeɛda takwaffurt, yettili diɣ ɣer wid ixeddmen di sbiṭarat yettlusun ijirbaten. Sṣenf-a, yettɣab mkul mi ara yeṭṭixer umdan i tɣawsa i as-d-islalayen lahlak-a. Yella diɣ, ligzima n uḥerbal( aḥerbali, allergique), d ṣṣenf mucaɛen ɣer yimeẓyanen . Nettaf di ddeqs n tikkal aṭṭan n buneggaf, neɣ aḥerbal-nniḍen ama s ameẓyan ama di twacult-is. Ɣas yettɛeṭṭil aṭas di temẓi, yettṛuḥu wer tuɣalin ma ifat meqqeṛ umdan.
Acu n ttawilat n usejji i yellan mgal lehlakat-a?
Lsas n useḥbiber si ligzima n usami d aṭixxer ɣef yal taɣawsa i t-id-yettakken. Ma d adawi-s, ilaq ad yili s amejjay n uglim, imi d netta i yeẓran acu n ddwawi i ilaqen d yiwellihen iwulmen akken ad yeḥlu uglim. Ma d asejji n ligzima aḥerbali yebna ɣef ddeqs n ddwawi i d-yettakk umejjay yenxaṣṣen i yimawlan, ad ten-sxedmen s ttawil i umeẓyan, akken diɣ ur ilaq ara ad as-ssiriden s ṣṣabun amḍiq n ligzima. Ma di tallit anda lahlak-a ur d-iban ara, ilaq imawlan ad ssexdamen kra n ddwawi i telweɣ n uglim n llufan akken ur t-ikemmez ara imi akmaz irennu deg ugur-ines.
Salima Dali