Ḥmed n At Lḥaǧ si taddart n At Lḥaǧ deg At Dwala. D afellaḥ, ixeddem tamurt, ittidir kan s lɣellat i d-ittak wakal-is.
Yiwen wass di ḥartadem, ikker ttnasfa n yiḍ, ieebba-as i zayla snat n tcekkarin n neɛma, iruḥ, yewwi abrid n wasif ɣer Taxuxt, ɣer tessirt ad d-iẓeḍ. Imiren, ittili lɣaci aṭas. Yewweḍ d amezwaru, kksen-as wiyiḍ nuba, nnan-as ur tẓaḍeḍ ara dagi. Iḥellel-iten, xersum ad as-fken nuba, ugin. Akken yuyes, idewwer-d zayla-s, yerra-d s axxam. Yelḥa-d asurif, izzi ɣer deffir ibda la isgermud. Qqaren-d, akken iḍal i tizi, tissirt teḥbes, iɣuraf-is ugin ad dewren. ḍefren-t lɣaci-nni, ssuturen deg-s leɛfu, netta ileḥḥu s axxam, yugi ad ibren ɣur-sen.
Seg wass-nni, tissirt-nni ur teẓḍi. Saɛid Muḥed Weɛli si taddart n Tewrirt Musa yewwi asefru:
‘’Ad nendah s Sidi Ḥmed yeqreb
Ɣef yizem i yerkeb
D uccen yettɛasa lmal-is
Netta d lewḥuc i yleɛɛeb
Ulac lekdeb
Ttɣiman daxel urebbi-s
Qḍu-aɣ-d taɣawsa neḍleb
Lǧennet ay nerɣeb
Ad nečč di neɛma-s
D netta i yewwin iẓiḍ
Ur yugad
Ikker, qbel ad yali wass
Ɣer tessirt ḥedd ur yewwiḍ
Netta iruḥ deg yiḍ
Tezwar akk medden neɛma-s
Ẓḍan-d di nuba-s wiyiḍ
Yuɣal-as d lɣiḍ
Ur yeɛlim ḥed s lḥala-s
Nnan-as rfed ad tɛebbiḍ
Xas ruḥ ad tnadiḍ
Tisyar wejdet aṭas
Ikker-d ssyin ur yeɣliḍ
Mi iɛedda s aḥwiḍ
Ittlaei lqudra, tsell-as
Ṭṭes a yelli ahat teɛyiḍ
Aṭas i teẓḍiḍ
Nɛas deg-s yerẓa-s
Aɣref ḥader ad tezziḍ
Lqewt ur t-terniḍ
Isxeḍ, inṭeḍ deg gma-s
ḍefren-t-id s kra n teɣri
A gma ma ur aɣ-teɛfiḍ
Di ssuṛa-s ibeddel lweswas
Ufiɣ-k ziɣen texliḍ
Ur iyi-d-tenniḍ
Aɛemmaṛ yeffeɣ, dayen xlaṣ.
Ramdane Lasheb