Am yal aseggas, imezdaɣ n Tubiret d tamiwin i as-d-yezzin, ttmagaren amenzu n yennayer akken iwata, imi ttqabalent s tmeɣra d waṭas n leqdic. Ama d tiddukkliwin tidelsanin, neɣ d iɣerbazen. Yettɛeddi umenzu n yennayer s cfawat, s yisaragen, d umbiddal n yisirmen gar yimdanen. Aseggas-a, s wudem unṣib, Tubiret ad tesfugel s yixf n useggas amaziɣ deg uɣerbaz Xales Hammouche deg Beclul anda ara yeḥḍer lwali d waṭas n yimḍebbren-nniḍen, gar-asen anemhal n usegmi. Ɣef leḥsab n yisallen i aɣ-d-yewwḍen, yezmer lḥal dakken aɣerbaz-a, ad yeldi tiwwura-s i yimḍebbren ara d-yasen seg teɣlift n leqraya. Sin wussan mbeɛd, d taddart n Yilyiten, deg tɣiwant n Saharidj ara yesfuglen s umenzu n yennayer s uncad n waṭas n yimḍebbren n twilayt anda yiwen n leqdic s wazal-is yebda acḥal n wussan aya. Nnig n wallalen ssexdamen At zik, timsikkent, ad teɛmer s yisafaren n wučči yemxallafen yerzan taddart-a s timmad-is. Ad yili usfugel n yennayer deg yal aɣerbaz n tmurt.
Ad yili usfugel n yennayer s wudem unṣib deg yal aɣerbaz azzayri
Deg yiwen yizen i d-tceyyeɛ tneɣaft n usegmi i 48 yinemhalen n usegmi, anda i teṭṭaleb asfugel n yennayer deg yal aɣerbaz n tmurt ass n 12 deg waggur-agi deg-i i nella, tbeggen-d tneɣlaft n usegmi azal yesɛa wansi-a i icudden ɣer yidles d umezruy n tmurt n lezzayer. Am wakken i teḍleb deg yimḍebbren n yiɣerbazen i wakken ad sfuglen yennayer s leqdec adelsan (ccna, tamezgunt, isaragen…), zyada ɣef uheggi n seksu s yiyuzaḍ i yinelmaden ass-nni n yennayer. Ma d iɣerbazen, aṭas n leqdic i d-yettwaheyyan deg-sen, am wakken ara tili yiwet n tzabut i yinelmaden n uswir alemmas ara d-theggi tenmehla n waddal d yilmeẓyen s lemɛawna n tnemehla n usegmi d tesweḍt n tmaziɣt.
Smail. M