Iḍelli acer, 8 deg yennayer 2017, ddmen warrac iqraben, qqlen ɣer tɣuri-nsen. Mbeɛd mi d-wwten ugar n sin n wayyuren nutni qqaren, rnan kra n wussan d asɛeddi n yikayaden, tewweḍ-d teswiɛt n usgunfu i llan ttraǧun.
Fukken ihi wussan n yimuras imezwura n tsemhuyt n ccetwa i d-yettunefken i yinelmadeni wakken ad ten-farsen gar twaculin d wayen-nniḍen i asen-yehwan. Yuɣal-d lawan n uxeddim d useqdec n wallaɣen. Yuɣ lḥal imuras n useggas-a aɣurbiz, mgaraden ɣef watmaten-nsen : yella-d ubeddel deg-sen tikkelt-a. Imi yettwarna umḍan n wussan n yiɣimi i warrac deg tmurt. Seg 15 alami d 18 n wussan. Aya yella-d d rray i d-yekkan seg Uɣlif n usegmi, neɣ sɣur tneɣlaft-is massa Nouria Benghebrit i d-iberrḥen s yisalli amaynut. Ad d-nebder kan belli ɣas ma teɣzif cwiṭ twala n yimuras, wanag arrac ur bran i leqraya, ur tt-rran ḥala i tɣimit. Amedya, deg wussan yezrin, llan yinelmaden deg Ayt Smaɛel i yernan isragen n temsirin n useḥfeḍ ɣur kra n yiselmaden i yebɣan ad ten-ɛiwnen. Imi asen-d-gan ahil d amecṭuḥ akken ad sneflen aswir-nsen ugar. Ladɣa wid ara yesɛeddin akayad n BEM. Ccɣel-a i asen-d-yefkan abaɣur, iban yerna-asen-d ayendin n lebɣi, yessebɣes-iten ad ɣren ula deg yixxamen, ad heggin iman-nsen i tuɣalin. Ass-a ihi, d ass wis sin n yinelmaden deg uɣerbaz, deg tsemhuyt talemmast n useggas-a aɣurbiz. Afud igerrzen i warrac-nneɣ!
Kaïsa Khalifi