Deg umenzu n Yennayer sfilliten medden i lxir , ad ffɣen iberkanen, ad kecmen imellalen . Beddun ttiɣzifen wussan, gellun-d s tafat, s temlel ttrajun ak medden akken i tt-nurja ula d nekni. Nessaɣ tacemmaɛt tamellalt akken ad taɣ tafat-nneɣ, di sin, akka i tent-nḥemmel tcemmaɛin, d lfal amerbuḥ! Lwerd amellal mbaɛɛid i yettreqriq, yeqqar-d deg wallen-is ayen akken izedɣen ul-is. Yufa iman-is deg uxxam zeddigen ur yumis, kra n tiɣmert yuli wammus, yessazdeg-itt s tmuɣli-s, yerna-as di sser i leḥyuḍ-nni ɛzizen tcebbeḥ tumlilt, am yal ixef n useggas. Am ifellaḥen, zik-nni, i nmuger ass amezwaru n yixef n useggas, ad nbeddel tagnit, ad nbeddel taswiɛt, imi bdan ttiɣzifen wuḍan, tebda tettban-d tafat am tin i yellan deg wul. Akka kan ara ffɣen iberkanen i deg wezzilit wussan, ad kecmen wussan ɣezzifen, teɣzi n leɛmer imi ara d-nemyaf, di sin, di tegnatin n rrebbaḥ. Anda nebɣu nili, ass-nni ad d-nemlil, ad neččar urawen n lehna. S kra ara yekk wass amezwaru n Yennayer d nekni nesfillit kan i lxir, ma nerra-tt ɣer tẓidanin ad tafeḍ imawen-nneɣ ččuren d tazart, d itemriwen, d lǧuz d lluz d wayen ẓiden ɣef yiles. Tiɣimit-nneɣ ɣer rrif n lkanun, ula d win ad as-nbeddel inyen imi s kra yekka useggas fell-asen i nesewway almi ɣman s wanbuxxen, ad nbeddel ijdiden, d imellalen, am wussan nettargu. Ad ddmeɣ tummiẓt n yirden, ad tt-deggreɣ gar ikufa, akken ad ččaren alamma feggḍen d lxir. Mi nesfallet merra i wayen yelhan, ad nerr i yimensi, iḍ-agi d seksu s useqqi aquran: d abisar, d aǧilban, d lɛes; ad nezlu ayaziḍ, qqaren : “akken yeqqwa rric-is ara tgerrez tyerza, ara yili lxir», d winna axir!. Lɛezza-w imi ara neseww ayen yak yettnejbaden: d timsemmnin, d aḥeddur, akken ad yejbed lxir, ad yesɛu leɣri. Ass-agi maci am wiyaḍ, win yettawin temlel deg wul, ala tuffɣa ara ffɣen iberkanen. Bu tlatin, rnu-yas sebɛa isufar, ma rnan tiftilin, ad beddlen tagnit, ad yefti lxir, ad feggḍen wulawen, ad as-beddlen udem i ddunit, ad d-nnunten!
Zira