Nuwwara, di Rradyu tis snat
Rradyu tis snat, am leɛwayed, yali mi ara d-yeḥder Yennayer, ad d-theggi yiwet n tmeɣra meqqren di tzeqqa n yidles Aissa Messaoudi n Rradyu n Lezzayer, lexmis-agi, si 20h ɣer ttnaṣfa n yiḍ, ak d tcennayt n teqbaylit, m ṣṣut n uwaqur « Nuwara ». Nuwara yezzuznen s tezlatin-ines acḥal d aqbayli, tecna tayri, tamurt, Ǧerǧer, afennan, tameṭṭut… nnig n 40 n iseggasen d amezgun di Rradyu n teqbaylit. Xas ulamma d iseggasen-aya i tɣab, tuɣal-d s waṭas n tmeɣriwin texdem sya usya. Xas leɛmer iteddu, mazal ṣṣut-is am wasmi tebda ccna, mazal ad tecnu i wid tt-iḥemmlen.
Takfarinas, di Zénith
Akken d-yuɣal ɣer wid t-iḥemmlen dseg useggas iɛeddan s lexedma-s iwennɛen mliḥ, s ccna n ccaɛbi, s tejmilt i lwaldin, s ccna n wul, n leḥbab, d usirem, Takfarinas ad awen-yefk ttiɛad di tzeqqa n Zénith di temdint n Lpari, i lmend n Yennayer 2962. Yuɣ lḥal tameɣra-s taneggarut ixdem-itt di tmenɣast, ayendin n medden i tt-iḥedren xas ulamma xuṣṣen ttawilat maɛna tɛedda akken ilaq lḥal. Takfarinas, i s-yessnen i usayes (la scène) am akken s-yessen i ccna, s rriḥa n tmurt yettawi di ṣṣut-is, di lmusiqa-s d tezlatin-is.
Malika Domrane, di Toulouse
Ttiɛad d Malika Domrane ass n 12 janvier i d-iteddun. D tagnit am wakken i t-id-tenna, ad as-terr tajmilt akken tt-yuklal, akken tt-turga acḥal d iseggasen-aya, i ucennay-nneɣ meqqren, yellan s idis-is asmi i tebda ccna “Slimane Azem”. Malika yesfilliten ad yili useggas-agi ajdid d lfal amerbuḥ i ccna n teqbaylit. Aṭas i wejdid i tettheggi i wid tt-iḥemmlen ama d c dines, ama d taktabt deg-i ara d-tejmaɛ merra ayen d-teccelqef si teqbaylit d wayen d-ǧǧan at zik, ama d ccnawi d waṭas n icennayen nniḍen. Yennayer ak d Malika Domrane, d asmekti, d ajdid, d asfillet i wayen yelhan i ccna s tmaziɣt.
Zira