Ass n lǧemɛa yezrin, tiqucac n udrar n Ǧerǧer dlent imerra s udfel i asent-yefkan yiwet n cbaḥa ifazen. Tasebḥit, abrid yettawin ɣer Tikjda yegguma ad yenneqḍaɛ s yimerriyen i d-yusan seg yal tama. Ama seg Sṭif, Lburǧ, Lezzayer tamanaɣt neɣ Boumerdès, amkan-a n tmerrit d waddal yegguma ad yawi annect-a n yimdanen i d-yerzan ɣer ɣur-s. Deg Teɣzert, neɣ Tinzar, truḥeḍ almi qrib d Aswel, tiwaculin, ɛemrent abrid, teddun deg udfel anda imeẓyanen smuheblen s wurar d usebded n lexyalat. Tuget n twaculin-a i nemmuger, fernent ad sfuglent s umenzu n yennayer dagi deg leɛlayat n Ǧerǧer imi nnant-d:”iḍelli, ur aɣ-tessefk ara liḥala iwakken ad nemmager aseggas amaynut deg yixxamen-nneɣ, deg tsusmi. Nebɣa ad d-nass ɣer da, i wakken ad nemmager yennayer gar medden irkelli, imi lferḥ yesɛa sser mi ara yezdi aṭas n yimdanen. Ass-a, ad as-necfu, yerna ad t-neẓẓu deg wallaɣer n warraw-nneɣ i wakken ɣer sdat d nutni ara ikemmlen.” Deg yiḍ n lexmis, teldi Tikjda tiwwura-s i usfugel n yennayer s waṭas n leqdic. Aṭas n yimdanen i d-yusan, sɛeddan tameɣra dinna imi ttawilat imerra ufan-ten-id.
Smail. M