Inelmaden i d-yewwin ikayaden n BAC d BEM n tɣiwant n Ayt-Smaεel yemmug-asen yiseɣ ass n larbεa 21 seg ɣuct sɣur wexxam n tɣiwant. Tameɣṛa-a d tin yeḍran deg wexxam n yilemẓiyen n temnaṭ. Deffir n wawal n teldayt awezlan n uselway n tɣiwant s yimedzi ( par intérim) Mass Macuc Ɛ/Lεaziz ay yesṛeḥben s wid akk yellan deg tzeqqa, yerna ibarek rrbeḥ i warrac akk, gar wid n ulemmud alemmas d wesnawan (secondaire), yettunefk wawal i wenmazul n uselway (vice-président) Mass Rebbaεi Sadeq ay ibarken seg tama-s i warrac, ibabaten, d yiselmaden, d wid akk yeddan yid-sen deg teɣzi n 9 n wayyuren akken ad d-yaweḍ wass-a, sey-in akkin yessawel i uxemmem ɣef tdeyyant muεayet n umεahed n Ssumam ay llan d amedya yeddren n uqaεed d usbeyyen iṣeḥḥan i yimal (avenir). Uqbel ad εeddin ɣer webḍaw n yisefkan (cadeaux) anmazul n uselway wis-sin Mass Saḥli Ɛ/Lqader, yesmekta-d i yinelmaden belli asirem-is, yebɣa ad ten-iwali s weswir yettnernin dima d yigerdasen (diplômes) ifazzen. Tewweḍ-d teswiεt ay ttraǧun warrac, annect-a yak yellan-d i walmend-nsen, nutni i iεetben lqidar n wayyuren n tɣuṛi. Taɣiwant thegga-d iselkimen imawiyen (ordinateurs portables) d isefkan i wid i d-ilawḥen tilemmasin igerrzen deg ukayad unṣib n bakaluṛya, Aya yerza kraḍ (3) n yimezwura yufraren : tanelmadt MEQṚANI Amal s tlemmast (16,90), ƐEMMARI Amal (16,57) Akked ALIM Suhila (15,04). Ma yella d wid n BEM, ĞEBBAṚ Meryem seg CEM n Taregregt, teṭṭef-d tacwawt deg taddart-is, deg sin n yiɣerbazen CEM n tɣiwant, s tlemmast (17,56). Ayagi daɣen yella-d d tagnit i yemḍebbren n tɣiwant n Ayt Smaεel bac ad fken i yinelmaden iqraben neɣ iṣakaduten akked yidlisen n tmaziɣt ama d ungalen, tullisin neɣ d isegzawalen : “Akal d wawal», “Timsirin n yid», “Lwali n wedrar», “Tafrara”. Isegzawalen “Hachette“ akked d ddeqs n yisegzawalen “ ISSINl“ n uprifisur Kamal BUƐMARA. Tameɣṛa-tettwaseqqef s yiwet n tgella tafessast i yiseɣ n wid akk id-yettwaεeṛden deg tegnatin n uzmummeg.
Mhenni Xalifi