Ass nni n lǧemɛa ɣef lɛecra n ṣbeḥ i d-tella temlilit i usali n tmeɣra n lfeṭṭa n At-Yanni. Yalla-d di lmendad uqerru n tɣiwant mass Deɣɣul Smaɛil d imanazen n ukabar n FFS. Mass Deɣɣul, isenmer akk wid d-yefkan afus n tallelt d wid ixedmen tazmert nsen, i usemres n tmeɣra agi. Seg-sen: tamahla n tezmert, taɣlest, aseqqamu n tmeɣriwin n tɣiwant, atg. Ma d anemhal n yidles, mass Uled ɛli Lhadi yenna belli ad yexdem meṛṛa tazmert-is i wakken ad yefru iɣeblan i yekerfen asefti n lḥirfa agi n lfeṭṭa. Mass ɛli Lɛesekri, amaray amenzu n tfidiralit n FFS, ifka afud i yilmeẓyen akken ad kemlen di leqdic agi, acku d netni ara yebnun azekka n tmurt. Ma d mass Racid Ḥalit, imḍebber nniḍen n FFS, ibeggen-d lferḥ-is i mi d-tuɣal tmeɣra agi n lfeṭṭa, yerna yessarem ad tettuɣal yal aseggas. S yin ferqen igerdasen n utteki i iḥeddaden d yinḍan nniḍen, d igerdasen usenmer i wid d-yefkan afus di tmaɣra agi. Tameɣra n lfeṭṭa n useggas agi, rzan-d ɣer-s ugar n 3034 n yimerayen, ayen ɣef ur bnin ara wid d-iheggan tameɣra. Aya yesferḥ-iten, yerna-asen-d affud. Ula d wid d-yewwin timzikniyin ferḥen imi d tagnit i wakken ad senzen sselɛa nsen, yerna ad zren medden acu xedmen. Ula d wid meṛṛa d-yerzan teɛǧeb-iten tmeɣra agi, ɣas akken ɣlayet lfeṭṭa. Leɣla agi ur as-uksanen ara iḥeddaden, imi d taḍbiqt n lfeṭṭa tamsarit i yeɣlayen, aked lexsaṣ n lmerǧan d nnil. Tameɣra agi tella-d daɣen d tagnit i tuksa n lxiq i wid akk tt-id-yerzan. Imi ass nni n laṛebɛa, aseqqamu n tmeɣriwin n tɣiwant ihegga-d tameɣra di taddart n Tegzirt. Ccebḥen-tt-id icennayen n teqbaylit, d wid d-yusan si Lmerruk. Yal yiwen yessaram ad tettuɣal tmeɣra agi n lfaṭṭa yal aseggas.
Lameyya Urak