Yal aseggas, ittezzi-d fell-aγ wass ideg temmuteḍ, ass-n ideg d-teγli fell-ak ttejra ! Akka i aγ-d-nnan, seg yimir-n neqqim akken, mebla ma neẓra ma d tidet neγ d lekdeb ; armi tamettant-ik tεelleq am tmettant n waṭas seg wid yernan deffir-k.
Am yal amulli n tmettant-ik, wa yettali γer uẓekka-k yellan di Tewrirt Mimun akken ad ak-d-yehdu tamuqint n yijeğğigen, wa icennu fell-ak di tmeγriwin i yemmugen γef demma, wa yessefray fell-ak neγ yerra-yak tijmilt s tmedyazt am akken i txeddem yal aseggas tdukla n Udrar n Fad i yefkan isem-ik i tfaska i d-tessudus di tγiwant n At Smaεil(Bgayet). Lḥasun yal yiwen am i ak-yettarra tijmilt. Wama ziγ ! Amek ara k-nettu ? Kečč i aγ-d-yeldin tiṭ i yes-s ara nsekked i lebda segmi i iεum fell-aγ ṭṭlam. Kečč i as-d-yerran azal i wawal n tmaziγt, awal n Si Muḥend Umḥend d Ccix Muḥend Ulḥusin. Kečč i aγ-d-inebhen γef leεyub n yimaziγen, i yefkan seg zik afus di tutlayt-nsen d yidles-nsen. Kečč i yesbuccεen at Uhellil n Timimun tessasneḍ-ten i leğnas merra, nutni daγen yal aseggas ttmaktayen-k-id, ttasen-d arma d aẓekka-k akken ad ak-d-awin isefra n usnemmer i ixedmen fell-ak. Imaziγen akken ma llan, seg Siwa arma d Tigzirin Tiknariyen, akk-nsen ggan-k d azamul n tumast i yettḥettimen γef Tmazγa ad temssalaḥ akked umezruy-is i sxerrben yimnekcamen.
Abrid i tneğreḍ ata yettiwsiε kra kra, γas ma llan yiεewwiqen, γas ma d iεewwiqen n zzman-ik i yugaren wid n wass-a, maca ixuss-aγ yiwen am kečč, amusnaw ara aγ-d-yettarran assirem, ara yesnernayen deg-neγ taflest d leḥmala n tutlayt-nneγ d yidles-nneγ. Nuḥwağ rruḥ-ik ad yefti gar-ane&gamma,; d netta ara γ-inehren deg ubrid n sswab ara γ-yessufγen γer tafat.
Mokrane Chikhi