Tusut takiwant (toux sèche), tettawi ddeqs n yimdanen s amejjay. Akken tezmer ad tili d ccira taxfifant, tezmer diɣ ad teffer kra n waṭṭan nniḍen labeɛda ma tɛedda 3 n leddwaṛ neɣ temlal d ccira nniḍen.
Tusut takiwant ?
D tusut yekkawen, ur d-ngellu ara s yičexṛuṛen. Akken tezmer ad tili kan weḥd-s, tezmer diɣ ad temlil akked ccirat nniḍen am tawla, asiḥḥi n tanzarin, aqṛaḥ n tedmart……atg. Ur ilaq ara amdan ad yestehzi deg yiman-is, imi di ddeqs n tikkal, tusut takiwant tetteffer kra n lehlak labeɛda ma tɛedda tlala n leddwaṛ.
D acu-tent sebbat n tusut-a ?
Tusut yettɣimin kra n wussa kan, sumata tettemlili d lehlak n ubeḥri, aṭṭan n twermin, tamsalmit n tɣanimin n turin. Ur telli ara d aɣbel, imi tzerri s ḥellu n lahlakat-a.
D acu ma tella tusut-a d tin yezgan, iɛeddan tlala n leddwaṛ ( toux chronique), isefk ɣef umejjay ad inadi s telqey di tudert n umdan s ddeqs n yesteqsiyen ammer ahat ad yaf kra n waṭṭan.
Imi ma yenna-s-d umuḍin tusut-a tettlal-d mkul tafsut ( timlilit d yidqi (pollen) neɣ mkul m’ara yennal kra am umcic, amejjay ad inadi ɣur-s aṭṭan u uḥerbal (allergie), ma yufa-tt diɣ tettlal-d deffir yal ljehd yessexdam umdan, yezmer ad inadi ɣur-s aṭṭan n buneggaf (asthme). Ula d asiḥḥi n tanzarin ɣer deffir, wazi (reflux gastro-oesophagien), axenzir (cancer) n turin lebeɛda ɣer win yettkeyyifen, aṭṭan n wul, tusut taseɛqit ( coqueluche) ttaken-d ccira-a.
Acu n wugur id-tettawi tusut-a i tudert n umdan ?
Tusut teččeṭṭin tudert, imi tettuɣal d ugur i umdan. Dɣa ma tettili deg yiḍ, tessefraɣ-as iḍes. Dayen ara t-yeǧǧen ad yefcel ṭṭul n wass. Ula d aṭuqqet-ines yessenṭarray tiɣanimin n turin. Aya yezmer ad yesḍul ḥellu n umdan ɣas sebba d taxfifant.
Kra n yiwellihen:
Tusut takiwant d ccira mačči d aṭṭan ɣef waya ur ilaq ad d-nettaɣ ddwawi melba lemcawṛa n umejjay ɣas zemren ad tt-ḥebsen di kra n wussan. Di yal tikkelt, ilaq ad nerzu ɣur-s akken ad iẓer ma d tusut taxfifant yuklalen kan ddwa, neɣ ad aṭṭan nniḍen yuklalen anadi d uwelleh ilaqen s amejjay nniḍen.
Salima Dali