Deg ussan-agi iεeddan i d-yeffeɣ udlis amaynut n umaru d imsuggel aqbayli Lounes Amziane iwumi yefka azwel “ Kra seg umezgun n « TCHEKHOV ». Yeffeɣ-d udlis-agi ɣer tezrigin Art Plume. D win ara yesnernin tasekla tamaziɣt d win ara d-yawin abaɣur i tutlayt-nneɣ tamaziɣt. D adlis wis tlata i d-isuqqel seg tefransist ɣer teqbaylit, syin akkin i d-yessuffeɣ d idlisen. Imi i d- yesuqqel 41 n tmucuha n « Jean de la Fontaine », s tewsit n tmedyazt d isefra ; aḥric amenzu yella-d usuffeɣ-ines deg useggas n 2012, iwumi isemma « Timucuha » ideg llan 20 n tmucuha. Aḥric wis sin dima s uzwel « Timucuha », yella-d useffeɣ-is deg 2013, ideg llant 21 tmucuha. Ma d adlis wis kraḍ d “Lexḍubegga” n Anton Tchekhov s uzwel-is anasli “Une demande au mariage”, i d-yeffɣen deg useggas n 2013.Yexdem deg udlis-agi ajdid taserwest “adaptation” seg tefransist ɣer teqbaylit n kra n wayen yura umussnaw Arussi Tchekhov, yesuqqel-d deg-s tlata n tceqqufin n umezgun (lexḍubegga, bu tenεemt, ṭṭrura n tissit n dexxan) umussnaw-agi, yerna yefka-d agzul ɣet tudert-is d yimahilen-is. Taɣuri igerrzen i yimeɣriyen.