Ass n lexmis yezrin, tamehla n Usegmi n Tubiret tessewjed-d yiwet n temlilit anda myagaren inemhalen n 53 tesnawiyin, imaswaḍen, tajmaɛt n yimawlan n yinelmaden, isandikiyen d yiɛeggalen n tɣamsa. Deg beddu n unejmuɛ-agi, anemhal n Usegmi Mass Mourad Bouziane yenna-d : “ Timlilit n wass-a d tin ara ɣ-yeǧǧen ad d-nessuk tamuɣli ɣef yigemmaḍ n lbak iɛeddan, s yin ad nwali igemmaḍ i d-ḥellan yinelmaden deg ukradyur-a amezwaru». Dɣa d yiwen n uxeddim lqayen i d-iheggan kra n yilmeẓyen d telmeẓyin yellan deg unaris n uwelleh. S ya ɣer da, anemhal n usegmi yeggar-d iman-is iwakken ad d-yessebgen kra n yiɛewwiqen d leɛyub I yellan deffir n uwexxer n uswir n leqraya. Almi d taggara n ubeggen n yigemmaḍ, yebda yiwen n uskasi qessiḥen yerzan aserwes gar yigemmaḍ n lbak iɛeddan d wid n ukradyur amenzu. S Tidet, assaɣ mačči d win i d-ibanen d uɣdim, acku gar snat n liḥala I nwala, ur d-yelli wayen yeddan akken I yetturaju. Aya, nwalat deg tesnawit n Lakhdaria i d-ihellan amkan wis sin deg lbak iɛeddan, meɛna deg ukradyur tella-d gar tneggura. D ayen yeǧǧan aṭas seg wid i d-yemmeslayen ad d-inin dakken igemmaḍ-a ineggura mačči d wid I d-yettbegginen aswir aḥeqqani n yinelmaden. Ama d inemhalen n tesnawiyin neɣ d imaswaḍen, awal yezga itezzi ɣef wamek ara d-ssalin igemmaḍ s usnerni n uswir ? Yal tikkelt ad d-yennulfu rray, meɛna llan akka wid i d-yemmeslayen ɣef wazal I tesɛa lɛessa d uheggi n yikayaden, am yiwen n unemhal i d-yennan : «Nekni nettmagar taluft n lɛessa i yettaǧǧan inelmaden ttemɛawanen deg lawan n yikayaden mebla ma yella-d fell-asen kra n lḥers. Mi d-wwḍen ɣer tesnawit, yettban-d uswir-nsen aḥeqqani. Ɣef waya, aqel-aɣ, s lebɣi-nneɣ, mi d lawan n yikayaden, ad neffeɣ seg temnaḍt-nneɣ iwakken ad nexdem anda nniḍen, iwakken s ubeddel-a ahat ad beddlent kra n leɛwayed yeccemten udem n uswir n yinelmaden-nneɣ.» Dɣa ayen yessetḥeyren s waṭas anemhal n usegmi mi d-tettwabeggen tfelwit amek I d-usant twilayin deg lbak yezrin, anda Tubiret yeṭṭfen amḍiq wis 28. Yenna ɣef waya : «Amek akka i aɣ-ifent twilayin yellan deg tneẓruft ur nesɛi ara ttawilat I nesɛa nekni ? Tiǧiratin-nneɣ yecban Tizi Ouzou, Boumerdès d Médéa zgant deg yimeḍqan imezwura, i nekni acimi ur nettaweḍ ara ?» Ɣer taggara n temlilit-a, iɣerbazen yellan akka deg taggara n tfelwit deg yigemmaḍ n ukradyur amenzu qqimen deg tzeqqa iwakken ad kemmlen axeddim ukkud tseqqamut n yimaswaḍen anda yeḥḍer ula d anemhal n usegmi. Dɣa da, yella-d wawal ɣef ubeggen n yiɛewwiqen i ttmagaren yinemhalen-a almi igemmaḍ xuṣṣen. Askasi d win ɣezzifen imi aṭas n tlufa i d-yettwaskeflen tid ahat yellan deg waṭas n liḥalat d iɛewwiqen i leqraya. Seg tama, tasqamut n yimaswaḍen tbeggen-d lebɣi-s iwakken ad tɛawen ama d iselmaden neɣ d inemhalen deg unnar iwakken ad tessizdeg tagnit I uxeddim iwulmen. Ad d-nesmekti kan belli ass n letnayen iɛeddan, yella-d uxeddim yecban wa yerzan aswir alemmas, am wakken yetturaju ad d-yili daɣ unejmuɛ ukkud uswir amenzu deg yimalas-a ideg nella.
Smail. M